Ayeri, cuando taba dando una vueltina per Xixón, nun de los pocos díes en que se pudo facer, recibí una llamada al móvil. Yera una voz conocida: Berto Álvarez Peña comunicábame qu’acababen de concedeme’l Premiu Timón qu’otorga l’asociación de l’Arribada. Nel pocu tiempu (según como se mire) que lleva llantáu, yá se fizo con un gran prestixu. Como se sabe, ye un premiu a la trayeutoria lliteraria de los escritores nacíos enantes de 1961. Vamos, a los vieyos. Depués falé col restu del Xuráu, pues toos quixeron ponese pa felicitame. Menos mal que la factura páguenla ellos. En serio, si tolos premios presten, esti que, amás nun tien dotación económica, ye de los que más presta, por dalgo lu ganaron xente de tanta nomadía como Nené Losada (un besín, cariño), Xuan Xosé Sánchez Vicente, el popular Manuel García «Galano», o Roberto Glez.-Quevedo. Pues eso: Munches gracies a los señores del Xuráu por pensar qu’esti escritor que escribe pa esos «pequeños anarquistes» que nun siguen les normes sociales, tien méritos p’algamar la perguapa escultura de Castañón. Sé que dientro de los nominaos había xente de munchu pesu, por eso ye entá más meritoria y más valiente la so decisión. ¡Qué sepa merecela!
