close
Agradecimientu…

Agradecimientu…

Como estos díes se fizo público en distintos “medios”, acaben de concedeme’l Premiu de Lliteratura Xuvenil “Montesín” pola novela “Fontenebrosa II: La rebelión de los Homosaurios”. Si cualquier premiu ye siempre bienveníu y produz muncha gayola, esti lo ye especialmente por dellos motivos.

El primeru porque tener una distinción que lleve’l nome de la novela de Mª Xosefa Canellada, ye siempre un honor. El segundu porque’l propiu premiu en sí aporta tamién un gran prestixu, polos sos anteriores ganadores a los que me sumo yo agora, y porque, non en baldre, la editorial Trabe fai un esfuerciu grande cola so concesión. Y en tercer y últimu llugar, porque la mio novela ganadora ye la segunda parte d’una obra qu’esti añu cumple los 25 años (¡coño, qué vieyu soi!). N’efeutu, “Fontenebrosa: El Reinu de los Silentes” espublizóse nel añu 1984, siendo la primer novela xuvenil escrita n’asturianu y la segunda en tolos xéneros (precedida pola de Miguel Solís “Les llamuergues doraes”). Y escribir la segunda parte d’una hestoria que tien un cuartu de sieglu, yera tamién un retu personal y lliterariu.

fontenebrosa-iQuiero agradecer dende esti modestu “blogue”, a la editorial Trabe la convocatoria del premiu que supón un estímulu pa los qu’escribimos, con mayor o menor aciertu, llibros pa rapazos. Al xuráu que me lu concedió, por pensar que lu merecía, cosa siempre difícil d’estremar pues, de xuro, el restu de les noveles tamién sedríen merecedores de ganar. Y a los profesores, escolinos y amigos que, dende va munchu tiempu, tuvieron pidiéndome qu’escribiera esa segunda parte qu’agora se premia y que, bien ceo, apaecerá en llibru. Quiero creyer que tará al altor de lo qu’ellos esperen.

Y yá, más nada. Dicir que me prestó muncho volver a inventar nueves aventures con Goyo, Ximena, el Magu Paniceres y los Silentes, xunto con tolos personaxes nuevos qu’apaecen y cola complicidá qu’espero algamar de los futuros llectores. Munches gracies a toos.