Michael McDowell fue un escritor norteamericanu que morrió mui mozu (49 años) de sida. Cultivó munchos xéneros y mui estremaos ente sí: terror, ciencia-ficción, culebrones… y collaboró en guiones de cine, ente otros la famosa película «Bitelchús» (Beetlejuice) de Tim Burton. La saga de «Blackwater» consta de seis volumes y ye una de les obres de más ésitu del autor. Escritos n’un añu (1983), fue petite del autor el que se publicaren d’esi mou: al estilu de los antiguos novelones que salíen por «entregues».
Blackwater cuenta la historia d’un pueblu ficticiu d’Alabama, «Perdido», onde reside la familia Caskey, una de les families riques de la rodiada. Acabo finar el primer tomu, de títulu «La riada» onde, como ellí se diz, produzse una enorme riada que dexa a la mayor parte del pueblu embaxo les agües del escuru Blackwater, el ríu qu’escurre a traviés del pueblu, marcando parte la vida del mesmu. D’esa pergrande crecida surde un personaxe que llega a «Perdido» ensin papeles y con una historia poca clara. Ye Elinor Dammert, una moza guapa y misteriosa que va tracamundiar les rellaciones personales del pueblu, faciéndose parte importante de les mesmes.
Quiciás lo más guapo de la novela ye ver cómo les persones fuertes, les importantes de Perdido son les muyeres. Toes elles con un carauter fuerte y peleón que, anque nominalmente nun ocupen los llugares preminentes nin políticos, nin económicos, son les que, en vero, lleven les riendes de lo qu’asocede. O seya, les que manden. Nun solo eso, sinón que los propios paisanos danse cuenta d’ello y apáutense en qu’asina siga siendo. Ye una prestosada siguir les histories que van entemeciéndose na novela, con un aquello de misteriu ya inclusive de fantasía, que l’autor remana con maestría. Un primer volume mui interesante, qu’envizca al llector a siguir colos siguientes llibros de la saga. Polo menos eso ye lo que yo voi facer.
