Nel añu 2006, publicábame l’Academia de la Llingua, na so Coleición Lliteratura Xuvenil, la novela ¡Alabín, bon ban…! La historia d’un neñu chaboleru y marxinal, que vive con so ma, y que pa evadise del so presente, duru y murniu, suaña con que ye un gran futbolista. El llibru recueye, en capítulos impares, cachinos de la vida real de Martín y la xente cola que se rellaciona: Carmela, so ma; el Chori, el so meyor amigu; Fátima/Scherezade, la so collacia d’escuela; Telvino, l’amigu inválidu, Dedé, l’inmigrante negru… Y nos pares, los suaños futbolísticos del rapaz como porteru de la Seleición Española de Fútbol. Ye una historia, paezme, dura, pero cuntada con un ciertu tonu desenfadáu que-y quita fierro al asuntu.
Agora, la editorial colombiana «Libros & Libros, S.A.», cola que yá tengo publicaes otres dos noveles, asoleya una versión en castellán empobinada al mercáu llatinoamericanu. Una versión que ye muncho más qu’una mera torna, pues contién munchos cambeos respeutu al orixinal. Per un llau, la llingua emplegada ta revisada polos pedagogos de la editorial, de mou que pueda ser meyor entendida pol públicu d’allá ya, inclusive, sirva pa la so entrada nes escueles. Pero, amás, reescribiéronse dellos capítulos y modifícose dalgo’l final, dándo-y un poco más de continuidá. En resume, que cuasi resulta una novela distinta, anque caltién, llóxicamente, la cadarma de l’anterior. Ye una pena que nun entre nos planes de la editorial la so distribuición nel mercáu español, anque seguro que si dalguién tien el petite de consiguila, pue facelo dirixéndose a la propia editorial colombiana.
Yá pa finar, dicir que me resulta mui prestoso, y un pocoñín emotivo, ver el resultáu del mio trabayu lliterariu pa neños
y rapazos, espeyáu n’esta nueva novela que, anque ye la última d’una llarga llista d’elles, quiérola como si fuere la primera. Y ye que a los fíos lliterarios tamién se-yos tien ciñu.
