Tengo dicho notros llugares, y quiciás nesti mesmu blogue, que colos escritores (homes y muyeres) pásame una cosa curiosa y ye que los hai que nun me caen bien como persones, y en cambiu préstame muncho lo qu’escriben, y al revés: hai dellos escritores que me presten como persones, pero nun me da más polo qu’escriben. Mario Vargas Llosa ye un de los del primer casu. Nun me llevo bien con él a nivel personal (ensin tener el gustu de conocelu), pero cuasi siempre me gusta lo que cuenta y cómo lo cuenta. Tengo, amás, un muestréu grande pa poder afirmalo porque creo que, práuticamente, lleí toles noveles que publicó y nel orde nel que fue publicándoles. Igual lleí primero “La ciudad y los perros” que “Los jefes”, pero bueno, eso ye cosa menor. Y ye que, dende’l puntu de vista del llector, ye importante conocer la obra que se llee nel so propiu contestu, por muncho que se diga qu’hai noveles “eternes” o “inmortales”. Seguro que ye asina en dalgún casu mui particular, pero polo xeneral ye importante rellacionar lo que te cuenten cola época na que se fai. Por poner un exemplu: nun ye lo mesmo lleer “Conversación en La Catedral” nel añu 1969, cuando tas estudiando nuna universidá franquista, como fue’l mio casu, y lo que se cuenta cíncate mui de cerca –anque seya con un oceanu pel mediu- que lleela agora, fuera del contestu universitariu, social y políticu que-y da sentíu a la historia.
Fino agora de lleer la última novela de Vargas Llosa, titulada “Cinco esquinas”. Teníala en llista d’espera pero fui colándo-y otres de más actualidá o que m’apetecíen más. Y asocédeme como siempre, o seya, que me presta lo que me cuenta l’autor y el mou en que lo fai. ¡Escribe mui bien el señor Llosa! Les “cinco esquines” a les que se refier ye’l nome d’un barriu limeñu, un de los más probes, onde viven cuasi tolos personaxes de la novela que conformen un microcosmos marxinal y marxináu, al llau de los barrios de los ricachones que tienen grandes cases y que viven d’espaldes a ellos. A esi submundu o inframundu de xente al marxe del sistema, pero que sirven pa que’l sistema funcione anque fuere a costa de llevalos a ellos per delantre.
Ocurre, a veces, qu’esos dos mundos se toquen, o inclusive entren en colisión y d’ehí surde’l conflictu. Unes semeyes escabroses que comprometen a un destacáu ciudadanu de l’alta burguesía peruana, caen en manes d’un periódicu sensacionalista y de mala fama, pastu de llectura pa les clases más populares pero cuyos ecos lleguen tamién hasta más arriba. Pero ¿quién ye’l que tira de los filos que mueven esos escándalos? ¿Con qué fines? D’eso va esta novela. De la prensa sensacionalista, amariellista, y de los pocos (o nengunos) escrúpulos de la xente que la mueve. Pero tamién de la ocultación y de la impostura d’unos supuestos ciudadanos exemplares que, a la hora la verdá, nun lo son tanto. D’esos dos mundos –cielu ya infiernu- Vargas Llosa describe cuasi meyor a los condenaos del infiernu, persones humildes, corrompíes pola sociedá y pol so petite de salir d’esi estáu nel que s’afayen (Felipe Peineta, la Retaquita, …), qu’a los prohomes de la sociedá, preparaos pa defendese de toles maneres pa qu’aquellos nun los mancillen.
En cualquier casu, “Cinco esquinas” resulta (resultóme a min) un poco plana y previsible, ensin esa mecia de tiempos y espacios que tan buen xuegu suel da-y al escritor peruanu, anque siempre se llee con interés y agradu. Y lo que ye mui claro y esnala penriba de tola historia, ye que se trata tamién d’un mou de saldar cuentes con Fujimori, el so rival eleutoral en 1990, y col so brazu executor l’abogáu Vladimiro Montesinos a los que, llóxicamente, pon pingando. Novela, pues, menor del gran autor peruanu/español, pero que caltién un nivel que pa sí querríen otros munchos “escribidores” nos sos momentos de mayor rellumu. Paga la pena lleela.
