SEAMUS HEANEY.- El fallecimientu del premiu Nobel irlandés ye una murnia noticia. En primer llugar pa la familia, claro, pero llueu pal so País, pa la lliteratura mundial, que tampoco nun anda sobrada de referentes y, nun planu mui importante, pal nuestru pequeñu País. La categoría d’una persona pue midise de munches formes. Una la que cinca al so valir profesional, nesti casu la escritura, pero otra pa min más importante, la que respeuta al so altor moral. Nesti sen, l’amigu Seamus yera un campeón que, cuando les nuestres autoridaes y partíos políticos nun son a enfotase daveres na defensa y la recuperación d’un bien tan claru, como ye la llingua, él cola autoridá moral que se-y reconoz, vieno a Asturies a defender la oficialidá del asturianu. Un fechu que, anque ellos nun quieran reconocelo, dexa en ridículu a tola clas política asturiana. Que tenga que venir dalguién de fuera a enmenda-yos la plana a los de casa tendría de ser de ponese coloraos. Asina, pues, dexando pa otros el reconocimientu de los sos valires lliterarios, yo quiero recordar a Seamus Heaney como’l paisanu que fue. Como se diz vulgarmente con una espresión que tarrezo: con un par.
