La editorial Holocubierta, que ta especializada en xuegos de rol, comercializó, va poco, ún mui prestosu xuegu embaxo’l títulu: «Aventuras en la Marca del Este». Un territoriu míticu, perfechamente diseñáu, y habitáu per toa clas de seres fantásticos: elfos, trolls, enanos, unicornios, dragones… L’ésitu de l’aventura, llévala agora a publicar un llibru de rellatos d’eso que da en nomase «fantasía épica», que lleva por títulu «Cronicas de la Marca del Este», qu’afonda nesi espaciu mitolóxicu y nos sos personaxes. El coordinador del llibru, y espertu en toos esos temes de mundos fantásticos, de cuentos de mieu, y de munches otres coses, ye l’escritor Rubén Serrano, amigu carnal y collaborador en temes solidarios.
¿Tais yá viéndolo venir, non? Pues sí, Rubén pidióme un cuentu pa l’antoloxía de les Cróniques de la Marca y, anque
nunca nun me viere en tal aprietu, escribí-y una pequeña historia que cuido que nun desentone muncho del restu. Somos, en total, 14 escritores, con otres tantes histories fantástiques, collaborando nun llibru que saldrá, si nada lo torga, pa la yá inminente primavera. Mantendrévos informaos pa que, a los que-yos presten esti tipu d’histories, tengan la oportunidá de mercalu. ¡Ah!, por cierto, el mio cuentu titúlase «Más allá». Y ye que préstame facer mía la fras del escudu «Plus Ultra», porque nunca debiéremos poner llímites a la imaxinación humana.
