Avisélo cuando se dio virtualidá a esi híbridu llamáu «Cineteca», xuguete que se punxo en manes del ínclitu Cienfuegos, como pagu de nun se sabe qué servicios prestaos, porque’l gran serviciu fue demandar al Ayuntamientu de Xixón, cuando yera socialista, poniéndolu en ridículu por nun tener contratu y faciéndolu pagar una montonera perres. Pero too val con tal de quitar la tierra embaxo los pies del enemigu. Si ellos tienen el Festival de Cine de Xixón, vamos quita-yos presupuestos y vamos crear un ente paralelu pa ensombrecer los sos ésitos. Y, amás, vamos poner al qu’ellos cesaron a cargu del asuntu.
Como hai xente nel gobiernu asturianu que presume de saber abondo de cine, y el xuguete da pa muncho, agora acaben cesar al amigu Juan Bonifacio Lorenzo, Direutor de la Filmoteca, posiblemente la persona que más sabe de cine d’Asturies y una de les que más del restu del mundu mundial. Yo nun creo que, como dicen dalgunos, lo que se pretenda seya llevar la Filmoteca d’Uviéu como un despreciu a «la capitalidá». Eso, de ser asina que nun ye seguro, el que marche d’Uviéu, sedría en tou casu un dañu collateral. Porque lo que daveres cuenta ye fortalecer esi disparate competitivu puestu en manes de Cienfuegos, naguando por acorripiar, por cercar, al probe Festival de Xixón que, con menos perres y un enemigu crecíu, va a amustiar nos prósimos años pa que dalgunos pueda dicir: «Ves, ya te lo dícía yo, dende que marcho el «traidor, inconfesu y martir» aquello va de mal en peor. D’ehí a que’l Gobiernu Asturianu dicte les normes y programaciones del cine n’Asturies hai namás un pasu. Pero eso sí, del cine fechu n’Asturies y por asturianos nada. Eso nun ye intelectual.
Siéntolo por Juan Boni, persona a la qu’aprecio y que tien gran valir como profesional del cine, pero’l probe taba condenáu cuando principió esta guerra de trincheres onde dalgunos van de francotiradores. Y anque les sos maniobres son torpes, tienen bona puntería.
