Por motivos d’horariu (míu, non de la tele) vi por primer vez el programa de la TPA tituláu «De Romandela» el pasáu día 8. Sintiera falar mui bien d’él y, d’ehí, la mio pequeña deceición. El programa ye entreteníu y variáu, con cortes abondo pa facelu más llixeru, pero nin l’estilu nin el conteníu d’esti programa en concreto (repito que ye l’únicu que vi) me prestaron muncho.
Pa empezar, el presentador ye un rapaz nerviosu, confianzudu y que nun para de falar y, munches veces, d’atayar al que ta entrevistando, al puntu que cuando ésti paez que va a dicir daqué interesante, córtalu con otra entruga o dalgún comentariu personal. Hai que reposar un poco más, al mio modestu talantar. Yá se supón que munchos de los entrevistaos son amigos suyos, pero esi escesu de «coleguéu», d’abrazos, de palmaes nel llombu, de risotaes… nun programa de televisión, repito, a min nun me presta. Habrá otros a los que sí.
Pa enriba, ficieron de númberu gordu del programa Chus Pedro y Manolo y, la verdá ye que Chus Pedro paez l’amu de la TPA, nun sólo poles veces qu’apaez, sinón por esi aire de suficiencia que yá alquirió. Va de «mocín». Xunto a él, Manolo Penayos paecía que taba un poco «sobreactuáu» colo que dieron una imaxen que paecía que lo de la canción asturiana inventáronla ellos. Nada nun dixeron de los otros cantautores del «Nuevu Canciu Astur», que tan importante papel tuvieron nos anicios del Surdimientu: Xulio Ramos, Carlos Rubiera, Avelino, Rafa Lorenzo… Tampoco nada dixeron, o yo nun lo oyí, del autor de les sos primeres ya importantes lletres, l’escritor Manuel Asur (salió llueu nos «créditos» como autor de «Atiendi, Asturies» que’n dalgunos sitios ponen como de Ñuberu), que colos poemarios «Cancios y poemes pa un riscar» (1977) y «Camín del cumal fonderu» (1978) dio-yos material abondo pa les sos músiques. En fin, reconociéndo-yos la so gran aportación a la nueva música asturiana, repunáronme un poco.
Bien La Tarrancha, nel so papel avezáu, que lo ficieron con naturalidá
y oficiu, y regulín el Coru San Andrés, un poco desafinaos, pero que col marabayu qu’había nel chigre ye xustificable. Y dexo pa la fin el que, pa min, fue’l verdaderu trunfador del programa: José García «El Che de Cabaños». Un paisanu d’una pieza, que tovía a los 73 años tien una guapísima voz de tonada. Intelixente, modestu, simpáticu… fue’l contrapuntu de Ñuberu y emocionó falando de su madre, tamién gran cantante de tonada. Cuando-y entrugaron si se consideraba «un de los grandes», dixo modestamente que los había mui buenos. Más tarde, nel chigre onde finaba la fiesta, ocupó un llugar na parte atrás ensin que destacara la so presencia. En fin, sólo por él yá se xustificaba’l programa. A ver si puedo volver a asomame a otru «De Romandela», cola esperanza de que me convenza un poco más.
