Güei permítome la inmodestia de falar de llibros míos. Y ye que paez qu’esto de publicar, polo menos nel mio casu, vien a bandaes, como los estorninos. Llevaba ya unos cuatro o cinco años ensin espublizar nada n’asturianu -lo último paezme que fue «El síndrome de Scherezade«- y agora axúntenseme na menos que tres. Un d’ellos acabante salir y otros dos nel fornu pero yá asomando les oreyes.
La que yá ta ehí buscando’l so sitiu ye la mio segunda novela p’adultos (la primera fue aquella llonxana de «L’aire de les castañes» del añu 1989, reeditada llueu nel 2008 dientro «Les noveles de Xixón»). Una novela que lleva por títulu «La vida de siempre» y que, anque los editores axunten al xéneru de novela «negra», yo nun toi convencíu de que seya asina. Sí, ye verdá que se toca’l tema de la trata de blanques, y de la inmigración, y qu’hai unos cuantos mafiosos, y tiros y dalgún qu’otru muertu, pero too ello como resultes d’una situación personal del protagonista, más que d’un ambiente xeneral nel que se traten estos temes. Digamos que prima más lo individual que lo coleutivo. Lo que a min m’interesó contar ye cómo determinaos fechos, determinaes esperiencies mui intenses, faen cambiar la vidina tranquila d’un paisano y la so familia, dende un finxu de magar el cuál yá nada va a ser como enantes. Paezme que ye una novela entretenida y ya avisaré de cuándo se presenta por si dalgún estraviáu quier averase perellí pa charrar un poco.
La segunda que ta a puntu salir ye un d’esos xuegos lliterarios que tanto me presta facer. Titúlase «Cuadernu robáu» y lleva por sotítulu «El diariu de Concha». Los más vieyos de los que lleéis estos comentarios recordaréis aquel «Diariu d’Enol» que publicó l’Academia en 1988. El diario d’un rapaz adolescente, con unos pás recién separaos y onde va escribiendo les sos esperiencies familiares, escolares y… amoroses. Pues Enol ta perdidamente namoráu d’una compañera, estraña, adulta y mui suya que se llama Concha y que, amás, ye una lladrona. Agora, ventitantos años depués, diome por escribir el diariu de Concha onde ella fala de la so vida, de los sos por qué, y analiza los mesmos fechos que cuntó Enol, pero baxo una visión propia. Creo, sinceramente, que les confesiones de Concha, maltratada por so padre ya incomprendida por tol mundu, van prestar con independencia que seyan, amás, un «contradiariu» del d’Enol. Porque puen lleese perfeutamente ensin conocer l’otru. Esti llibru, talo que l’anterior, tan publicaos pola editorial Trabe.
El terceru -esto principia a aburrir- ye un album ilustráu pa llectores más pequeños. Lleva por títulu «El marineru que perdió El Norte» y fala d’un rapaz, pescador, que quier marchar del so pueblu y de la so xente pa buscar otru «Norte» onde ser feliz, ensin decatase de que la verdadera felicidá igual la tenemos más cerque de lo que camentamos. El llibru cuenta con unes guapísimes ilustraciones de Tina García, una moza llicenciada en Belles Artes, que vive n’Inglaterra y que, al mio paicer, supo garrar mui bien l’espíritu de la historia. Ya lo veréis. El llibru tien, amás, la garantía d’una guapísima edición, como tolo que faen Ester y Ángela de la editorial Pintar-Pintar. Y eso ye too. Perdonái si güei di un poco «la vara». Otru día, más. O meyor… menos.
