close
D’escritores y asociaciones

D’escritores y asociaciones

2012-04-28450Visitas

Armóse un bon espolín al rodiu de la metedura de pata de l’Asociación de Escritores de Asturias esaniciando a la lliteratura en llingua asturiana de los sos premios. Y llámolo «metedura de pata» por nun emplegar espresiones más gordes que podíen aplicase a una decisión ensin xacíu. Ensin xacíu, porque munchos de los socios de l’asociación son escritores billingües y, en dellos casos, sólo lo faen n’Asturianu. Y porque, amás, trátase d’unos premios que nun lleven dotación económica, anque la escultura que dan tien de tener un preciu. Cuerre pela rede un «manifiestu» de protesta robláu por un gran ensame d’escritores y xente arreyao a la cultura, nel que se condena apropiadamente dicha decisión. Pue vese ensin esfuerzu que la mio firma nun figura al pie del mésmu, pola única razón que naide nun me la pidió, anque consideróme representáu dientro la condena que d’esti fechu fexo l’Academia de la Llingua.

Pero dicho too esto, habría qu’aprovechar pa dir un poco más lloñe nes valoraciones. Y ye qu’un tien memoria y alcuérdase de los fracasos que siempre siguieron a la constitución de les varies asociaciones d’escritores en llingua asturiana qu’hubo a lo llargo estos años. Los escritores que facemos el nuestru llabor utilizando l’asturianu, intentemos crear una asociación que defendiese y abellugase a la nuestra profesión y a la nuestra llingua y, polos motivos que fueren, siempre fracasó. Dende aquella primera «Xunta d’Escritores Asturianos», hasta les que vinieron entamándose depués, munches veces en griesca unes con otres, quedó bien nidio la dificultá d’entendimientu que tuvimos persones y escritores que debiéremos tener trabayo en comuña, puesto que los nuestros intereses yeren los mesmos. Pero nun fue asina. Y la consecuencia d’ello ye que toes aquelles asociaciones desapaecieron ensin dexar escatafín, y namás la inclusión de dalgunos premios n’asturianu per parte d’esta ASociación d’Escritores d’ASturies, volvió a facenos visibles a efeutos asociativos. Una visibilidá un poco como d’hermanos probes, esa ye la verdá, pero qu’agora echamos de menos cuando desapaez.

Hai que dicir, per otra parte, qu’esta asociación d’escritores DE Asturies, ye una sociedá privada que nun pue (y espero que nun pretenda) representar a los escritores asturianos sinón, en tou casu, sólo a los sos asociaos. Poro, nun podemos echa-y la culpa, como si fuere un chivu espiatoriu, de tolos males, que nun son pocos, de los qu’escribimos n’asturianu. Yo, por exemplu, nun soi sociu (anque sí fui premiáu) y por tanto nun me considero representáu por ellos. En resumiendo: cualquier sociedá privada pue facer lo que-y pete, según marquen los sos estatutos, nel cumplimientu de los sos fines. Si l’Asociación de Escritores de Asturias quier quitar los sos premios n’Asturianu, que los quite. Agora sí, que nun cobre nin un euru d’axudes públiques, a menos que-y les dea l’Institutu Cervantes. Y en cuantes a nosotros, a los humildaos, marxinaos, despreciaos… escritores n’asturianu, nun carguemos nos demás los fallos, carencies o incapacidaes que nosotros tenemos. Que a estes altures de la película nun tengamos la nuestra propia asociación d’escritores, nun tien nome. O tienlu, pero nun ye mui guapu.