Nun sé si agora se quitó lo de «trabayadora», afitando que, en realidá toes lo son en mayor o menor midida. En llugar del mio comentariu, que seguro que nun tendría munchu interés, voi poner un poema conmemorativu de la efemérides. Nenguna voz meyor que la de Teresa González, cuando amás esti añu cellébrase’l 20 cabudañu del so fallecimientu, p’asoleyar esi tastu de derrota de munches muyeres que pasen pela vida ensin poder ser persones dafechu. Ye un de los primeros poemes qu’escribió -igual el primeru, en 1984- cuando trabayaba nuna cadena de montaxe na empresa Crady. Diz asina:
NESTA HORA
A vosotres, compañeres de trabayu de tantos años
Nesta hora
en que’l xelu acorripia les coraes.
Nesta hora
onde’l tastu y l’inxeniu
esanicien el caberu aliendu
na llarga y afogante agonía.
Nesta hora
d’angustiosa griesca ente ser
persona o cosa.
Nesta hora
de silenciosu silenciu,
de cansáu cansanciu,
d’aborrecíu aborrecimientu,
de vacíu enllenu de vacíos,
pienso en ti.
En ti muyer,
que nun fueron a dexate
nin el drechu de ser neña,
nin esfrutaste
l’asombru de la mocedá.
Pienso en ti,
que te tracamundiaron los suaños,
pola balleta.
L’arte
pola ferramienta.
A Beethoven
pol chirriar de les máquines.
En vosotros,
anónimos navegantes ensin estrelles,
que vos alloriaron
por malsatisfacer necesidaes primaries.
Peones de la fame,
inorantes de la sonrisa,
escaecíos del amor.
Pienso en vosotros,
sordos y coxos de la vida.
Nesta hora cabera
desdexada de tou ñiciu creador
y positivu,
dedícovos el mio sórdidu homenaxe,
cola esperanza de que nun tengais ná
p’ambicionalo too.
