Asina, col «Don» per delantre, fuésenos un gran escritor asturianu y una gran persona, porque Luis yera, ante too, una gran persona. Home modestu, calláu, cualquier otru que tuviere ganao la metada de premios qu’elli taría tol día pavoneándose como un gallu, o como un pavu, que ye lo que correspuende. Nun digo nada si, amás, tuviere una prestosa placina col so nome nel centru de Xixón, como ye’l casu.
Conocíalu de nome por esos premios que ganare y pola so novela «La borrachera», que s’editó dientro de la guapa coleición de «Las novelas de Gijón», publicaes por El Comercio y onde tamién apaeció la mía de «L’aire de les castañes» sobre la muerte de Rambal. Pero principié a tratalu de magar un coloquiu qu’hubo nel antiguu Ateneo Jovellanos, onde participábemos escritores tanto d’asturianu como de castellán. Creo que tamién andaba perellí la querida Carmen Gómez Ojea, anque nun podría aseguralo. Él y yo tábemos sentaos al llau y aprovechamos pa falar un poco, porque había un llazu común que yo conocía: Tanto mio padre como él yeren de Carbayín Altu, Siero. Eso dionos una especie de complicidá que llueu siempre nos acompañó a lo llargo’l tiempu. Recuerdo qu’esi día díxome, como disculpándose, que nun escribía n’asturianu, anque si-y prestaba lleelo. Coincidíemos munchos díes porque dambos vivíemos al rodiu de Los Campos, onde agora’l so nome perdurará yá pa siempres. Yo recordarélu cola so sonrisa sele y esi andar pausáu como queriendo pasar desapercibíu. Y ye que los grandes escritores nun necesiten emponderase, nin facese publicidá, cosa tan de moda nestos tiempos. Sólo necesiten ser ellos mesmos y, claro, escribir bien. Talo que don Luis Fernández Roces. Voi a echalu de menos. Que la tierra-y sea suavina.
