LA BRUXA PUMARINA SABE BRAILLE.–
El pasáu xueves día 4 de Xunu, nos llocales de la ONCE n’Uviéu, presentóse la edición nel sistema Braille del mio cuentín «La Bruxa Pumarina y el Dragón Maragatu». LLibru publicáu nel añu 1983 (¡qué vieyu soi!) pola Academia de la Llingua Asturiana y reeditáu (con unos perguapos dibuxos de Berto Álvarez Peña) nel 2004.
Paezme un fechu perimportante qu’una organización que desendolca tan gran llabor social como la ONCE, de un pasu alantre en defensa de la llingua asturiana y decida ufiertar a los sos asociaos testos na nuestra llingua. Y pa mi, personalmente, ye un arguyu y una satisfaición poder ver a unos personaxes creaos por mi, al algame d’unos neños invidentes que, d’otru mou, nun tendríen ocasión de poder esfrutar coles sos aventures.
L’actu fue presentáu y conducíu por don José Luis Iglesias, de la organización n’Asturies de la ONCE, ya intervino como invitáu don Pedro Zurita, filólogu, políglota (sabe más de 12 llingües) y que, pesie a la so falta de visión, viaxa constantemente invitáu poles más importantes instituciones del mundu, incluyía la ONU.
La conferencia de Pedro Zurita fue mui interesante y pa mi, amás, de muncha emoción, pues al entamar y saltándose’l protocolu previstu, lleó unos párrafos del mio llibru en Braille, con una gracia rellumante. Depués, Ana Cano como Presidenta de l’Academia y esti qu’escribe, recoyimos de manos de Carmen Martínez, verdadera alma mater de les actividaes culturales entamaes, un exemplar del llibru y aprovechamos pa dar les gracies.
Finalizáu l’actu, Pedro Zurita, que ye de Cangues d’Onís, quixo falar con nosotros n’asturianu porque, como el nos dixo, nel ambiente nel que ta cuando vien a Uviéu, nunca pue facelo. Una tarde, en resume, mui entrañable y que va a suponer l’aniciu d’una collaboración mayor ente l’Academia y la Once. Yo, pol mio llau, quedé comprometíu en dir a falar colos neños cuando a ellos-yos preste. De xuro que va a ser bien ceo. Dende equí, munches gracies a toos/es.
FESTEXANDO A LOS OCEANOS.-
La llocalidá asturiana de Piedres Blanques acoyó, el día 8 d’esti mes, el Día Mundial de los Oceanos dedicáu nesta ocasión a «Les islles de Castrillón: una güeyada a la mar». Nel IES Isla de la Deva, organizóse una Mesa Redonda na que participaron distintes visiones del tema, por mediu de Rubén Serrano, periodista y escritor, que tien una novelina pa neños que se desendolca na Islla de La LLadrona; Jesús Angel, pintor; Ánxel Nava, escultor; los fotógrafos Miki López y Juan José Arrojo y el propietariu d’esti blogue, o seya, yo mesmu. Moderó Xuacu Álvarez, fotógrafu somarín y alma mater de la cellebración. Asistieron, tamién, la Conceyala de Cultura del Ayuntamientu y dellos conceyales más.
La Mesa Redonda tuvo mui animada y d’ellí salió la idea de facer un pedimientu a les autoridaes autonómiques pa que declaren a la Islla de la Lladrona Monumentu Natural, a fin de que tan importante llugar ecolóxicu, tea protexíu totalmente de contaminaciones y especulaciones de cualquier tipu. Una xornada, pues, importante.
MARÍA XOSEFA CANELLADA CON NÓS.- 
Refiérome, claro ta, a la Bibliteca Virtual María Xosefa Canellada que presentamos, el pasáu día 12 de Xunu nel Antiguu Institutu de Xixón, la so creadora María Mar Martín Martín («la neña de les cuatro emes»), acompañada pol fíu de María Xosefa, don Alonso Zamora Canellada y esti qu’escribe, «que pasaba perellí». Fue prestosísimo oyer falar a don Alonso Zamora, cola modestia de los grandes homes, y cuntar delles anéudotes familiares mui carnales y significatives. Depués María Mar desplicónos les posibilidaes d’esa ferramienta tan interesante, y útil, que va a suponer un «bancu de datos» impagable, pa tol que quiera averase a esi mundu apasionante y apasionáu de la lliteratura infantil y xuvenil en llingua asturiana. Siéntolo polos que nun asistieron.
