Faciendo un repasu de lo último que ta publicándose en Lliteratura Infantil y Xuvenil vemos cómo los argumentos, coles honroses esceiciones de siempre, tienden a averase a lo que se conoz como «lo políticamente correuto». O seya, lo que trata d’acosos escolares, abusos de les redes sociales, problemes de neños y neñes inmigrantes (lo mesmo nel país d’orixe como nel de llegada), o coses asemeyaes. Y paezme bien que se traten estos temes, vamos llamar «de denuncia», pero ello ta faciendo qu’otres histories, por exemplu, les grandes histories d’aventures, de misteriu, etc. que siempre poblaron el mundu de los rapazos, tean perdiéndose. Y nun too tien de tener «mensaxe» y si lu tien hai que pidir que seya como resultáu de lo que se cuenta, non como únicu oxetivu.
Poro, lleer una historia protagonizada por animales a los que-yos pasen coses d’aventures, de llucha pola vida, de sobrevivencia, ye mui prestoso. Y too ello si amás asocede nel marcu siempre misteriosu del Bosque. Esi protagonista de tantes y tantes histories tradicionales que nos lleguen dende l’aniciu los tiempos. Esi espaciu máxicu que, pueblos y cultures alloñaos nel tiempu, habitaron y adoraron pues suponía, al tiempu, mieos y abellugu. Cultu relixosu, caza pa sobrevivir, pero tamién llugar onde s’escondíen seres malignos qu’acesmaben dende la solombra.
Nesi espaciu que ye tantes coses, desendólcase esta historia que, a lo llargo d’unos cuantos díes, una madre (Covadonga Onís) llee al so fíu que, esteláu, nun quier dormir pa nun interrumpir el filu de la narración. Y nosotros con él. Pero ye que, amás, al final esti tamién va ser un cuentu con mensaxe, sólo que nun nos da más que lo seya, porque esi mensaxe vien ancultu por una historia de les d’antes, de les clásiques. El llibru, editáu guapamente por Pintar-Pintar, cuenta col añadíu d’unes guapísimes ilustraciones que pinten mui bien col tonu de lo que se cuenta. Talo qu’aquellos grabaos de los llibros antiguos de la nuestra infancia que, como diz Ester Sánchez la ilustradora, «conecten con la imaginación y el corazón.»
Pasái a conocer a Carlota, una curiosa esguil que quier correr aventures, y el so amigu el sapín Óscar que s’apunta a facelo con ella. Y asina descubriréis los misterios de «El bosque de la Vieja Secuoya». Un llibru «de los d’antes» y un bon regalu pa pidir a los Reis Magos… Si fuisteis buenos.
