close
«El cielo de los dinosaurios»

«El cielo de los dinosaurios»

el-cielo-de-los-dinosaurios2Esi ye’l títulu del últimu llibru en castellán que vien d’editame la editorial Pearson/Alhambra. Acaba llegame a casa, polo qu’entovía ta calentín del «fornu». Trátase d’un «cuentiariu», neoloxismu qu’emplego pa desplicar que se trata d’un «bestiariu» en forma de cuentos, o unos cuentos que formen un «bestiariu». El volume recueye once histories protagonizaes, d’una o otra manera, por dinosaurios. Nunes son los suxetos de la narración, y notres los oxetos. Dientro d’elles hailes d’estremada triba: unes son fantástiques, otres realistes. Unes son simpátiques (creo), y otres tristes. Ya, inclusive, dalgunes paezme que te faen pensar.

El porqué, depués de más de 60 millones d’años, los dinosaurios siguen interesando ye un misteriu. Quiciás seya porque los tenemos llantaos neso que los «cursis» llamaríen «l’imaxinariu coleutivu», o porque de dala manera rellaciónense cola mitoloxía, con aquellos seres mitolóxicos apavoriantes, como los dragones. O quiciás, cenciellamente, porque despierten en nós curiosidá y mieu, dos cualidaes mui humanes.

La orixinal portada del llibru (un «dino» fechu con llaves) ta diseñada pol artista asturianu Pablo Amargo, que fue Premiu Nacional d’Ilustración, y que pa mi ye un arguyu que m’acompañe nesta nueva aventura lliteraria. Nun sé si los llibros tán ya nes llibreríes, pero si nun ye asina, aína tarán. Si por casualidá vos apetez mercalu, toi seguru de que va a prestavos. A ver si acierto.