close
“El cuento de la criada”

“El cuento de la criada”

Cuando nel añu 2008 diéron-y el premiu Príncipe d’Asturies de les Lletres mui pocos la conocíen, y los periodistes tuvieron que tirar de Wikipedies y coses pol estilu pa poder poner dalguna cosa y recomendar obres suyes. Nun quiero tirame pegotes pero yo yá conocía dalgo d’ella. Nun tien nengún méritu porque la verdá ye que soi mui clásicu nos mios gustos pero, casualmente, un d’esos gustos clásicos (clásicos en min, que non “lliterariamente” clásicos) ye la Ciencia-Ficción.  Y, yá digo, un poco por casualidá, tenía lleída una guapísima novela d’una tal Margaret Atwood, titulada “Oryx y Crake”, que diba de distopíes (yá sabéis, lo contrario de les utopíes) y de la época que vien depués d’un ataque ñuclear, cuando cuasi espaez la raza humana. Total, que sí conocía a la Atwood anque me sorprendió que-y dieren un premiu importante a dalguién qu’escribía “noveles de xeneru”.

Lleo agora la so famosa obra “El cuento de la criada”, famosa porque una serie d’estos díes, basada nella, ta teniendo munchu ésitu y munchos premios, anque entovía nun la vi. Nun m’estraña esi ésitu porque la novela de Margaret Atwood tien muncho que cuntar y, sobre too, muncha reflexón que facer. Ye, tamién, una distopía, pero como ye mui prósima nel tiempu cuasi paez una crónica anunciada de lo que pue pasar dientro de nada. Ye un país llamáu Gilead -remedu de los Estaos Xuníos- que cola disculpa d’ataques terroristes fechos por islamistes, xunto cola dificultá de concebir neños, torna a una especie de puritanismu gobernáu por códigos mui severos nos que, una vuelta más, les muyeres son les grandes perdedores. Les criades a les que se refier el títulu, son les supuestamente fértiles, esclavizaes al serviciu de los notables de la sociedá, pa tener fíos con elles, al marxen de que tean casaos con otres muyeres, les “oficiales”.

Pero esta trama que resumo en poques pallabres, tien una gran complexidá ideolóxica, moral y hasta visual, pues les muyeres tán distribuyíes por colores de magar la función que faigan na sociedá. La historia ta cuntada en primer persona pola protagonista, la criada Defred, que como’l so nome indica ye De Fred, o seya, posesión d’un Comandante o Xefe d’un distritu que se llama Fred. Pese a tola complexa estructura que caltién la narración, ye una historia cenciella, reflexiva, poderosa pola so fuerza visual y, permitime qu’emplegue un términu en desusu, “escabrosa”. Pol fondu y pola forma, con dalgunes escenes enllenes de conteníu sexual.

Margaret Atwood toca temes importantes nel desarrollu de la so narración. La utilización de la muyer, cola perda de tolos sos derechos. La peligrosidá de los rexímenes totalitarios y lo cerca que tamos de volver a ellos. La influyencia de la relixón y la so mecia cola política. El pocu valir que damos a vivir nun réxime democráticu, que camentamos que se da por xeneración espontanía y que nun fai falta lluchar por él… hasta que lu perdemos. Pero too ello cuntao al traviés d’una historia personal, individual, la de Defred, que recuerda tiempos pasaos mentanto sufre y espera poder colar d’ellí dalgún día.

Una escelente novela, pues, d’esta veterana narradora canadiense que nos atrapa cola so perfecha prosa y la unversalidá de los sos planteamientos. De llectura obligada.

“El cuento de la criada”
Margaret Atwood
Torna d’Elsa Mateo Blanco
Salamandra
1985