Paez qu’esti xueves día 11 ye’l Día Internacional de les neñes. Nun sé mui bien (en realidá nun sé nada) del porqué s’escoyó precisamente esti día pa festexales pero paezme mui bien. Paezme mui bien que les neñes tengan un día especial estremáu del de los neños. Ye cierto que’n tol mundu hai millones de neños abandonaos, maltrataos, utilizaos n’exércitos o trabayando nes mines. Pa vergoña del mundu enteru, d’esos gobiernos que tanto presumen de democracies y niveles de vida, pero que nun son a evitar esta esplotación d’unos seres indefensos. Pues bien, les neñes participen d’esa mesma esplotación pero, amás, son esplotaes por ser muyeres, anque malpenes si munches d’elles desarrollaron la so condición. «Pena sobre pena y pena/ hacen que uno pegue el grito/ la arena es puñadito/ pero hai montañas de arena…», que dicía’l gran Atahualpa Yupanqui.
Falo de los gobiernos, pero’l compromisu coles neñes nun-yos correspuende sólo a ellos. Toos nosotros tamién tenemos les nuestres responsabilidaes, igual más piquiñines, pero les nuestres. Caún ellí onde pue incidir, onde pue ayudar. Yo, como escritor, túvilo siempre mui presente na mio obra, que puede ser meyor o peor, pero que siempre quixo da-yos valir a les neñes y a les moces, convirtiéndoles en protagonistes de les mios histories, igualando o superando a los sos collacios masculinos: Inés Saldaña («Les aventures de…»); Concha («El diariu de Concha»); Lisa («Elemental, querida Lisa»); Ximena («Fontenebrosa»); Casandra («La fada que nun quixo ser fada»); Lena de Maliayo («Fontenebrosa»); Etenko, etc. etc. Ye la mio forma personal de collaborar al espoxigue de les neñes, la so non marxinación, la igualdá, anque namás seya lliteraria, de les sos actuaciones. Asina que, nesti día suyu, anímoles dende equí a fender toles barreres sociales, familiares y económiques pa que nel futuru nun tengan que-yos dedicar un día n’especial. Porque tolos díes tienen que ser suyos.
