Esti día, 2 d’Abril, cellébrase en tol mundu el «Día Internacional del Llibru Infantil». La fecha correspuende a la del nacimientu del escritor Hans Christian Andersen, na so tierra de Dinamarca, allá pol añu de 1805.
Andersen, fíu d’un zapateru, fue un prestosu cultivador de la lliteratura infantil. Recopilador de munchos cuentos tradicionales del norte d’Europa, y autor personal de munchos otros, supo imprimi-yos a toos un toque de poesía y cenciellez que lu faen ser un de los cumales d’esti xéneru.
Sedría perdifícil entesacar de la so llarga riestra de títulos dalgún que rellume penriba de los otros, porque equí ya entren los gustos y esmolecimientos personales, pero si yo tuviere qu’escoyer dalgún d’ellos pondría en primer llugar a dos: El coríu feu y El traxe nuevu del Gran Duque.
Nel primeru, hai un tema que ta mui d’actualidá, que ye’l de los diferentes. El mal tratu que se-yos da a los que nun son como nós. El despreciu a los distintos: El «moro», el «sudaca», los que nun falen como nosotros, los homosexuales, etc.
Andersen recurre a una familia de coríos onde se cría ún que nun ye como los demás, ye más «feu»… dende la so perspeutiva, claro ta. Pero al dir medrando, aquel que yera despreciáu resulta que tien una guapura mui percima de la d’ellos. Esa guapura interna que munches veces tienen esos diferentes qu’avezamos a despreciar.
El segundu cuentu, El traxe nuevu…, ye d’orixe español y tamién mui conocíu. N’él ponse en
custión a esa babayonería de los gobernantes y los que los arrodien, que con tal de pasar polo que nun son, son capaces de facer el más grande de los ridículos y quedar desenmazcaraos por un rapaz. Dos muestres de cómo esa lliteratura supuestamente «menor», nos da una lleición d’agudeza y moral.
Aprovechemos esti importante día pa mercar dalgún llibru de la nuestra LLIX onde hai autores y temes tamién importantes. Y si nun ye xustamente esti día, da igual. Faigámoslo cualquier otru. Ye un mou de sofitar a una clas de lliteratura que ye, el primer pasu de los rapazos haza la so formación como llectores y, poro, como persones, y tamién a unes editoriales asturianes que trabayen muncho y bien, de forma cuasi desinteresada, pues les perres que se ganen nesta estaya nun les faen precisamente millonaries. Recordando, de pasu, que tamién tamos sofitando a una llingua, la de nueso, que bien necesitada ta d’ello. Motivos abondo.
