L’autor d’esta novela ye l’uvieín Manuel García Menéndez. Un escritor que, depués d’un par de llibrinos pa neños publicaos na coleición Escolín va munchos años -a mediaos de los años 80- tuvo un silenciu grande hasta retornar en 2013 cola novela «La sienda del amigu feliz». Nel 2018 gana’l prestixosu premiu «Xosefa Xovellanos» col títulu «El visitante impropiu» y esti añu pasáu da a la imprenta la so cabera obra, ésta que reseñamos agora.
«El faru de Gram» ye una novelina curtia, que nun algama les 100 páxines, y que l’autor asitia nuna pequeña islla danesa llamada como nel títulu, Gram. Ellí, durante’l llargu y crudu iviernu, viven cuatro persones solitaries que lluchen escontra esa soledá axuntándose un par de nueches a la selmana, pa cenar y cuntase histories y novedaes. Una ye una escritora de cierta fama, otru un xubiláu, la segunda moza ye pescadora profesional y l’otru paisanu ye’l propiu fareru. La vida trescurre sele y monótona, y los cuatro solitarios llévense bien, creyendo conocese unos a otros. La llegada d’un grupu maleantes a la islla con un fin perversu, fai qu’esa aparente xunión de los habitantes de Gram y esi conocimientu que se daba por sentáu fiendan dafechu. Asina, ante’l pelligru que representen los bandidos, caún reaiciona de manera estremada y nalgunos casos inesperada.
La novelina lléese con interés, anque paecía pidir un final un poco más matizáu, allargando l’aición unes cuantes páxines más, acordies cola presentación de los personaxes que faen el papel de «los malos». Al mio xuiciu esi final queda un poco precipitáu y escasu. Y hai, llueu, una cosa qu’a min non me presta nada, pero que nun ye propio sólo d’esti autor.Y ye la tresllación de formes llocales d’espresase, inclusive de vulgarismos, n’aiciones que se desendolquen n’otros contestos, nun sólo distintos, sinón opuestos. Asina, nun me pega nada y suéname mal, emplegar nel contestu d’una islla en Dinamarca, onde los protagonistes son daneses, espresiones como «oye ne», «Á Joli…», «oyes, ho» o llamar «chachu» y «chacha». L’autor tien tol drechu del mundu a emplegales, pero yo tengo tol drechu del mundu a que non me gusten. En cualquier casu, y como comenté enantes, la novela ye entretenida y la trama ta bien llevada. Norabona al autor y que siga ganando premios importantes.
«El faru de Gram»
Manuel García Menéndez
Ed. Saltadera
2019