Non, nun voi falar de sidra nin de llagares, o seya que si dalgún despistáu entró a lleer esta entrada con esa idea yá pue dexalo equí. Esti «fugitivu» del que falo ye’l títulu d’una novela escrita, nun principiu, por un tal Richard Bachman y yá tien unos añinos (1982). Y digo lo d’escrita «nun principiu» porque esi fue un nomatu utilizáu pol gran Stephen King pa mazcarar la so autoría, nun sé mui bien por qué motivos. El trucu descubrióse (con gran cabréu del autor) y agora ya consta dientro la espurrida llista de les sos noveles.
«El fugitivo» nun ye una novela de terror, como nos tien avezaos King, sinón que podría encuadrase más bien nel de «Ciencia-Ficción» o «ficción distópica». En cualquier casu eso ye lo de menos, tampoco nun hai que ser esclavos de les denomaciones. Tamos nuna sociedá futura fecha una llaceria, onde unos son mui probes, (y l’autor nun escosa medios lliterarios pa esplicánoslo) y otros mui ricos (pocos), y que viven separtaos por un apestosu ríu que los divide. Pero unos y otros viven embaxo la dictadura de la televisión, una televisión alloriante que llega a tolos requexos del país y que ye l’únicu entretenimientu que se pue tener. Y los programes que se promocionen son los concursos. Selvaxes, terribles, inhumanos, onde les persones se presenten por necesidá de ganar unes perres y poder llevar dineru a casa. Ben Richards vive nun de los suburbios de la ciudá. Ta nel paru, depués de dellos trabayos miserables, porque tien un carauter fuerte que lu lleva a enfrentase colos xefes y a intentar caltener unos mínimos de dignidá. Cada vuelta menos. Tien una muyer y una neña pequeña mui enferma a la que nun pue comprar les melecines por falta perres. Asina que decide presentase al concursu más estremu de los qu’hai, pero nel que más perres puen ganase. «El fugitivo» tien unes hores pa fuxir y escondese porque detrás d’elli van a soltar a los «Cazadores» que lu matarán en cuantes lu alcuentren. Cada hora que pasa son perres pa la familia del fugáu, cuanto más tiempu trescurra ensin que lu algamen más dineru podrá tener pa les melecines de la so fía, pa salir de la miseria na que viven, pa que la so muyer nun tenga que se prostituyir. Pero’l personaxe del fugáu ye presentáu como un criminal, un delincuente al qu’hai que delatar, porque ye un desfechu de la sociedá. Y a los delatores, a los que den pistes, tamién se-yos da un dineru pola so aición. Si el fugáu aguanta un mes ensin ser atrapáu, gana’l concursu y munchos millones. Claro que… entovía nun ganó naide.
Con eses premises se desendolca la trama la novela. Nun hai qu’esperar grandes llogros lliterarios porque nun los tien pero, a cambiu, sí tien una aición continua, con sorpreses y xubidones d’adrenalina pal llector que va percorriendo les mesmes aventures que’l «mocín» y sofriendo con elli. La historia ye mui «visual», lo qu’aprovechó Hollywood pa llevala a la pantalla col títulu de «Perseguido». Nun la vi, pero yá de mano tien un fallu pergrande. Escoyeron pa protagonista a Arnold Schwarsenegger, cuando lo que pretende la novela, y asina lo esplica, ye que seya un paisanu normal, delgadín y non mui sanu, anque mui intelixente, tolo contrario que l’actor escoyíu. En fin, coses de Hollywood y la taquilla. En resume, una novela mui entretenida, que se llee (como se suel dicir) del tirón, y que prestará a los amantes de los «distopismos», a los de les aventures y a los munchos fans de don Stephen King. En total, muncha xente.
