Leonardo Padura ye de sobra conocíu. Un escritor cubanu que tenía una pequeña saga (pequeña pol númberu de noveles non pol so conteníu) con un protagonista llamáu, na menos, Mario Conde y que, un poco sorpresivamente, polo menos pa min, ganó’l Premiu Princesa d’Asturies va unos pocos años. Tamién más conocíu n’Asturies, porque asistió a dalguna Selmana Negra y dieron-y un premiu (paezme que se llama’l “Dashiel Hammet”) Relleo lo escrito hasta agora y veo que me salió un mini-curriculum un poco peyorativu. Nada más lloñe de la mio intención. La so trayeutoria lliteraria ye amplia y enllena d’otros premios que lu señalen como lo que ye: un buen escritor.
Yo lleére dalguna d’eses noveles del “otru” Mario Conde que me prestaron (“La neblina del ayer”), porque retrata esa Cuba de los barrios baxos (qu’agora son cuasi toos), de los llocales d’alterne y el contrabandu, con unos personaxes entrañables que viven pa sobrevivir y añoren con señaldá lo que pudo ser y nun fue. ¿Por culpa de quién? Esi ye otru tema que merez ser tratáu n’otru momentu.
Dicía, pues, que tenía al autor cubanu como una bona referencia en cuantes al xéneru d’un tipu de novela negra mui personal pero, siendo sinceru, ensin que me paeciere nada del otru mundu. Depués de la llectura de la novela qu’encabeza esti comentariu, tengo qu’afirmar que la mio opinión al rodiu d’él tuvo un cambiu dafechu. N’efeutu, “El hombre que amaba a los perros” ye una gran novela.
Pa empezar porque nun paez una novela, sinón una especie de mecia de distintes biografíes que, non por ser conocíes, quita’l menor interés a lo que se cuenta. Más bien a la escontra, porque les histories de Padura rellenen los munchos furacos que dellos teníemos nes vides de los protagonistes, dando asina sentíu a unos fechos que toos conocemos pero d’un mou esporádicu. Como una suerte de semeya fixa, envede como una película na que los fotogrames se soceden ensin saltos. Asina, persabemos que fue un tal Ramón Mercader el qu’asesinó a León Trotsky asestándo-y un golpe na cabeza con un piolet. Y qu’esi tal Mercader yera un milicianu comunista que lluchaba na Guerra Civil española cuando fue reclutáu pa tan macabru destín. Pero Padura nun se conforma con falar de los personaxes de Mercader y Trotsky, sinón que, al rodiu d’ellos, va ufiertándonos cómo yera la España en guerra colos bandos y banderíes que se formaron na retaguardia republicana, y cómo yera aquella espantosa Unión Soviética presidida pol dictador Stalin y les purgues y maniobres qu’emplegó pa desfacese de tolos sos supuestos enemigos, que yeren, en concreto, tolos que participaron con Lenin na consecución del estáu socialista bolchevique, tres pasar por una cruenta guerra civil. Nun quería dexar nengún escatafín, nengún cabu sueltu, que pudiere face-y solombra a una realidá qu’él, como na novela de “1984”, tresformó al so antoxu.
El gran méritu de Leonardo Padura ye novelar, de mou mui entreteníu, una parte de la Historia d’España y de la URSS, a traviés de los protagonistes qu’él escoyó, Mercader y Trotsky, un Trotsky en permanente fuga en cata d’asilu políticu, acorraláu por un enemigu toupoderosu qu’acabó con elli nel momentu en que quixo, acordies colos sos intereses políticos. Ramón Mercader, el de los mil nomes distintos, fue namás el brazu executor de los designios del dictador, pente medies de los servicios secretos rusos que lu prepararon pa la so misión. Otru gran méritu del escritor de La Habana ye la creación d’un personaxe ficticiu (esti sí), un escritor cubanu decepcionáu una y milenta veces col destín de La Revolución cubana, que paga nes sos carnes la deriva del réximen, y que ye’l que cuenta la historia de les dos histories. Unes histories que surden paraleles hasta que, con mayestría, l’autor va enriedándoles, entemeciéndoles, espurriéndoles hasta llegar a esi puntu nel que, por fin, s’alcuentren: El momentu del asesinatu. Too na novela funciona a la perfeición, el ritmu, la descripción de los personaxes, les reflexones de los mesmos, les sos duldes y seguridaes… hasta llograr una gran novela. Una de les que más me prestó en munchu tiempu. Por eso, recomiéndola con gran enfotu.
