Dan-y, con toa xusticia, un premiu Príncipe d’Asturies (nun sé mui bien cuál) a Joaquín Lavado «Quino», o como meyor se lu conoz: el padre de Mafalda, porque Mafalda ye yá, dende va munchos años, una persona con entidá propia. Con más personalidá que munchos de nosotros, ella siempres ye consecuente, non como nós que traicionamos más que falamos.
Paez que Quino (voi ponelo yá ensin comines) tuvo dalgún reparu n’aceptar el premiu, o daquién dixo -seguro qu’un que nunca diba a ganalu- que debiere tener dalgún reparu en facelo porque ye un premiu monárquicu, y él ye republicanu. Respetando tolos paeceres (o cuasi toos) tengo de decir qu’eso me paez una patagüeyada. Vivimos nuna Monarquía, aceutada dientro una Constitución pola mayoría del pueblu español. Bien ye verdá que yeren otros tiempos y otres circunstancies y, yá lo dixi en delles ocasiones, lo más xusto agora que se fala tanto de cambiar la Constitución, sería facer un referendum sobre la forma d’Estáu. Pero esi ye otru tema. Asina que, hasta qu’eso nun se faiga, lo que tenemos ye una Monarquía. Tolo que vien del Estáu, entós, vien d’una Monarquía, los premios, pero tamién los impuestos, les carreteres y les pensiones. Yo nun renuncio a nada, lo bono y lo malo. A ver quién ye’l guapu que renuncia a la so «pensión monárquica». Ta bien ser escrupulosu, pero tampoco nun hai que se pasar. Porque entós renunciamos a les coses municipales onde gobierna el PP, o les autonómiques onde gobierna Bildu. Pero bueno, esto ye too un poco aneudótico y entiendo que nun se tea d’alcuerdo conmigo.
El casu ye que Quino tuvo un premiu merecidísimu por un llabor maraviosu que ye crear una familia de personaxes colos que tanta xente pue
identificase. Porque Mafalda nun ye sólo Mafalda. La gracia del personaxe ye, nun sólo la propia, sinón la del contrapuntu que-y dan los sos collacios de viñeta. Asina, la intelixencia de Mafalda rescampla pola tochura de Manolito; el realismu de la neña, destaca frente al sentimentalismu de Felipe y el so despiste esistencial; y el feminismu de la nuestra protagonista ridiculiza a la postura de muyer tradicional de Susanita, por poner namás dalgunos exemplos. Y ye que Quino nos fala a traviés de tolos sos personaxes. Él ye Mafalda, claro, y asina caltién el so discursu antimilitarista, ecoloxista, solidariu, pero tamién necesita, pa completar esi discursu y que nun seya un aburríu monólogu, de les voces de los otros personaxes que, amás, tamién te faen pensar n’otres postures nes qu’igual nun cayeres. Por nun falar de les voces y les postures de los entrañables padres de Mafalda, que son un poco les de los nuestros padres porque, nel fondu, tolos padres dicen -decimos- coses paecíes, según el tiempu que nos tocó vivir.
Poro, nun se pue dicir que Mafalda ye un referente moral nestes sociedaes que tanto lo necesiten. Lo correuto, y lo qu’hai que reivindicar ye que Quino ye esi referente moral que tanto se necesita, y que Mafalda y los otros personaxes son meros instrumentos nes sos manes/llápices. Yá sé qu’esto ye una obviedá, pero ye que a fuer d’oyelo, el personaxe termina arramplando col autor, talo que pasó con Sherlock Holmes y Conan Doyle, lo cuál fue mui inxusto pa don Conan y ta siéndolo pa don Joaquín. Poro, dende esti modestisímu blogue provincianu, quiero manda-y un abrazu mui, mui fuerte a Joaquín Lavado, Quino, y dici-y que toos nosotros tamos un poco en deuda con él. Y que lu almiramos a traviés d’esa neña que tanto nos fizo pensar y reir. Una neña que, pel tiempu trescurríu, tien que tar yá a piques de la prexubilación. ¡Quién lo diría!. Pues na, norabona, collaciu.
