Hai veces, nesti Xixón del alma (como diz la canción «hortera»), que se solapen dos actos culturales a los que te prestaría dir. Eso fue lo que me pasó ayeri, martes, en que nel Antiguu Institutu presentaba l’amigu Antón García l’antoloxía d’Eugenio de Andrade, Les manes enceses y, al tiempu, facía lo propio Luismi Piñera col so Diccionario de El Natahoyo, nel Centru Municipal del barriu, mui cerque del Club Natación Santa Olaya onde suelo dir a nadar (menos de lo que debiere). El compromisu previu que tenía con Luismi fizo que nun pudiere asistir al actu del Institutu, anque la familia tuvo bien representada (muyer y fía). Y ye que dende va munchu tiempu, tengo un compromisu moral col barriu’l Natahoyo. Ellí tengo grandes amigos y elli, nos duros años sesenta del sieglu pasáu, trabayé coldu con coldu con ellos nuna postura crítica col réxime franquista, dende la Sociedá Cultural Natahoyo que yo axudé a crear.
Corría l’añu 1964 cuando la punximos en pie, con una primera direutiva na que figuraben Antonio Sarmentero (el Pro), Emilio Estrada (Lino), Pedro Sabando (el Sorbiellu), y Luis Prado (el Zurdu), ente otros dellos, dalgún yá esapaecíu. El primer llocal que tuvimos fue na Fundación Revillaxixéu, nun aula que nos dexaba’l Padre Gago, pa ya, bien ceo, alquilar un llocalín mui afayaízu na cai Balagón, con un pequeñu bar na cocina. Consiguióse interesar a los rapazos del barriu, enantes avezaos parroquianos de Casa Menendo, y asina al cabu un añu yá yeremos más de 130. Entovía tengo por casa’l vieyu carné plastificáu de sociu
El llibru de Luismi Piñera recueye daqué d’esto, un poco, claro, porque si non necesitaría, como diz él, una enciclopedia en llugar d’un diccionariu. Un diccionariu que, en realidá ye un mou de reconstruyir la historia del barriu. Abúltame que ye un aciertu da-y esa forma, porque asina la so llectura fáese mui entretenida, variada y sorpresiva, porque nunca nun sabes con que vas a atopate na páxina siguiente.
Tiempu y espaciu. Un tiempu que va dende’l primer documentu escritu que se conserva, del 4 d»abril de 1078, en que la familia del conde Pedro
Laínez vende al Obispu d’Astorga, don Pedro Muñiz, una villa que llevaba por nome «Villa Ataulio», del que derivó, tiempo depués, El Natahoyo. Y un espaciu que percorre tolos requexos del barriu: dende la Estación del Norte que, como dixo’l Direutor del Muséu del Ferrocarril, nun yera la frontera del barriu, sinón la puerta, hasta Cuatro Caminos. Dende La Fábrica Moreda, hasta los Astilleros. Tol actu, los cuatro ponentes, fue un cantu a la gran personalidá natahoyense, a la so importancia dientro del Xixón pasáu y presente. Ellí se punxo la primer industria de Xixón, una curtidora, y toles que vinieron depués, nunos terrenos llanos, cerque del puertu y del ferrocarril y nos que los fumos de les fábriques, col nordés que siempres sopla, salíen pa fuera la ciudá. Grandes fábriques, como Moreda, La Fábrica de Loza, los Astilleros. Dos playes: la de Pando o del Natahoyo y la del Arbeyal, Una estación de tren. Y persones y personaxes, qu’exagüen les doscientes y munches páxines d’un llibru que ye un recuerdu y una memoria. Fechu col amor y el cuidáu que siempres pon Luismi en tolo que fai, y la rigurosidá, por más que dalgún de los otros invitaos, como ye propio del calter críticu del barriu, dixera que «tenía dalgunes pequeñes errates». ¡Faltaría más! En fin, una guapa presentación y un nuevu llibru d’esi investigador llocal que ye Luismi Piñera, al que nun sé qu’esperen pa facer Cronista Oficial de Xixón. Naide lo merez más qu’elli.
