El próximu xueves, día 15, a eso de les 6 de la tarde, vamos presentar esti llibru editáu pola editorial Trabe que recueye la mio obra cuentística dende l’aniciu de los tiempos (lliterarios). Cuando Trabe me propunxo reeditar el llibru «El Norte», cuasi desconocíu pola so mala distribuición, que contenía ocho cuentos, comenté-yos la posibilidá de, calteniendo’l nome, atropar tola mio obra del xéneru curtiu nun nuevu volume. Aceutaron encantaos, y d’ehí surdió esti llibru al que-y tengo munchu ciñu pues recupera cuentos mui queríos por mi.
La presentación del mesmu va correr por cuenta de la Doctora en Filoloxía y especialista en crítica lliteraria Rosana Llanos. Nun conozo personalmente a Rosana, lo cual ye bono pa qu’ella pueda tener una opinión más oxetiva de los testos y facer una valoración ayena a esi mundu tan pequeñu que formamos escritores y críticos en llingua asturiana, que munches veces nos solapamos: yo preséntote a ti, y tu preséntesme a mi. Rosana ye una bona conocedora de la nuestra llingua, anque ella esprésase en castellán que lo domina meyor, y nesa llingua sedrá lo qu’ella nos cuente. Asina me lo pidió y yo aceuté encantáu.
Poro, ellí taremos el xueves pa falar d’esos más de 40 cuentos y, si fai falta, d’esi periodu de 35 años qu’hai ente’l primeru y l’últimu de los cuentos. Un periodu que coincide col desendolque del Surdimientu, un acontecimientu que vieno a camudar el panorama lliterariu del nuestru país. Espero veros perellí.
