Lleí les noveles de Kiko Amat (Saint Boi de Llobregat, 1971) un poco desordenaes. Principié pola tercera, recomendada pol mio fíu Xuan, «Rompepistas» (podéis ver reseña nel Buscador), que me paeció buenísima. Ye más, cuando me piden (que ye mui poques veces) opinión al rodiu de noveles xuveniles, nun digo los tópicos de «El guardián entre el centeno», o los yá mui masuñaos clásicos d’aventures (London, Melville, De Foe…), o «Alicies» o «Roales Dahles», con tolos mios respetos pa ellos. Digo, ente otros qu’un día detallaré, esta novelina de Kiko Amat que me prestó pola vida. Adolescencia en grau superlativu, Rock, Punk, desamores, antihéroes, humor corrosivu… nun sigo. La segunda obra que lleí, «Cosas que hacen BUM», nun me dio más por ella, y acabo terminar la cuarta que lleva por títulu esi que pongo un poco más enriba.
Nella, nesta novela, ta tamién tol mundu d’Amat, colos antihéroes, la música, los desamores y l’amor polos marxinaos, solos o en grupu, pero too ello suena yá un poco repetío y fálta-y el frescor de «Rompepistas». Equí, en llugar d’un adolescente namoráu, ye un paisanu na crisis de los 40 que lo tuvo too y agora nun tien nada. Escribió una novela d’ésitu, pero ta atascáu. El gran amor col que se casó fizo crisis, por culpa de so, y nel trabayu periodísticu nel que yera reputáu, agora escribe al dictáu d’un xefe al que-y tien que facer la «pelota» pa que non lu despida. La caída de Cienfuegos ye llibre hasta aportar a lo más fondo, onde tán non yá los marxinaos, sinón los «lumpen». Hai que recuperar la vida y l’amor, ¿pero cómo?
La prosa de Kiko Amat sigui siendo rompedora y desllumante pero, repito, nun suena a nueva. Y nel fondu la novela hai una tristura que persigui al mocín (un mocín adocenáu), tracamundiada nun sarcasmu bastante dañinu. Y yá sabemos que’l sarcasmu nun ye humor, o si lo ye, vien acompañáu de grandes fargataes d’estricnina. Por too ello, «¡Eres el mejor, Cienfuegos!» ye una novela que se llee bien, que participa de les virtúes y los defeutos del autor, que dacuando te fai riir o pensar, pero que nun tien el frescor nin lo novedoso d’otres obres del de Saint Boi. Más afayadiza, quiciás, pal que nun lleere nada d’él. Esperemos tiempos meyores.
«Eres el mejor, Cienfuegos»
Kico Amat
Editorial Anagrama
