Roberto González-Quevedo ye una de les persones a les que podemos axudicar, con mayor aciertu, la pallabra «poliédricu» pola diversidá de los sos conocimientos y la novedá de les sos publicaciones. Filólogu, antropólogu social, filósofu, ye tamién un de los escritores de la primer xeneración (¡cómo me fadia eso de les xeneraciones!) que sigui escribiendo ya innovando al puntu que un yá nun sabe que palu-y falta por tocar. Inventor de mundos mitolóxicos, tien a la so «Pesicia» como un abellugu, un refuxu onde asitiar los sos poemes o les sos hestories faciéndonos cómplices d’una época y un país indeterminaos pero que, al tiempu, toos sabemos ónde ta.
Atrévese agora’l señor Quevedo, quiciás asonsañando al so predecesor el Villegas, con un xéneru que nun ye satamente la picaresca, como ésti, pero que sí la roza selemente cuando nos fala d’unos «flaires l.libertinos» que cuerren tres les muyeres, como «pícaros» encegolaos pol asuntu del sexu.
L’aniciu de les hestories que nos cuenta l’autor vien referenciáu por un testu medieval que l’historiador Américo Castro atopó na Catedral de Zamora, nel añu 1930, y del que fizo un estudiu filolóxicu. El testu recoyía un escritu del añu 1281 de la priora del monesteriu de Zamora empobináu al señor obispu Ordoño Álvarez, denunciando unos fechos «escandalosos» producíos nel dichu monesteriu de Nuestra Señora de las Dueñas. L’autor nun tien claro, nin entra nello, si los fechos fueron cierto o inventaos. Mui posiblemente esto último, por mor de los conflictos ente les órdenes relixoses y les que teníen tamién frente al obispu. En cualquier casu, el tema da-y a González-Quevedo pa escribir una ficción lliteraria d’esa rellación ente «las monxas candongas de Zamora ya los flaires l.libertinos», que ye como se titula’l llibru.
La pallabra «candonga» pue prestase a estremaes interpretaciones, anque toos tenemos, más o menos nidio, el sentíu que tien. ¿Muyeres allegres, muyeres fáciles, de pocu xuiciu, en castellán «ligera de cascos»…? El diccionariu de l’ALLA nun entra a desplicalo pero dámonos una idea. Hai a lo llargo’l llibru unos cuantos exemplos d’eses conductes, vamos llamar «libidinoses», pero siempre presentaes de mou lliterariu, nunca cayendo na vulgaridá, nin na coña fácil. Pa ello l’autor valse de metáfores que funcionen perbién y qu’eviten lo que d’otra manera pudiere considerase demasiao direuto o escarniao. Sería como la otra cara de la moneda de tantos cuentos o chismes de cures, ames, sacristanes y muyeres piadoses que pueblen l’imaxinariu y l’aneudotariu de munches canciones o refranes asturianos que tán en boca de toos. «Tantu cura, tantu cura. Tantu cura, tantu flaire. Tanta muyer sin maríu. Tantu rapacín sin padre».
El llibru ta escritu na variante occidental del asturianu, anque cuando un entama cola llectura nun ye a pescancialo pues lleese mui facilmente, ayudáu por un tipu de lletra que los que tenemos la vista cansa, agradecemos. Asina, pues, otra arista más que sumar a esti autor que nunca dexa de sorprendenos con cada una de les sos publicaciones.
