Títulu: Patria
Autor: Fernando Aramburu
Editorial: Tusquets
Añu: 2016
AGOTANDO’L TEMA.- Empecé a lleer el libru con un aquel de rocea. Ta presente en toles llibreríes como esos best-sellers publicitaos poles grandes editoriales, como los premios Planeta y esos otros d’autores de moda. Asina, que púxeme a ello namás que porque lleí, un poco al debalu, un comentariu positivu del críticu del País, Carlos Boyero, al que tengo que da-y les gracies porque tamos delantre d’una señora novela, actual, interesante, absorbente, entretenida. Ye más, creo que con Patria queda agotáu’l tema lliterariu del terrorismu vascu.
Y ello ye asina porque la novela de Fernando Aramburu ye capaz d’ufiertanos, pente medies d’una estructura argumental cenciella, de capitulinos curtios, con diálogos abondosos y un llinguax cuasi periodísticu na so simpleza, tolos numberosos prismes, tolos estremaos ángulos que presenta esti llaceriosu tema que ye’l terrorismu d’ETA. Tán presentes na narración les víctimes y los verdugos, pero cauna d’estes dos partes, tien unes ramificaciones qu’Aramburu esmenuza con intelixencia y, si non fuere un poco irreverente dicilo, con cariñu. Amor y desamor. Amistanza y odiu. Razón ya irracionalidá… el llibru ta enllenu de dicotomíes que nos endolquen, que nos envuelven coles sos desplicaciones, pero que nun vienen a traviés de grandes discursos o filosofíes, sinón a traviés del comportamientu y les reflexones d’unos personaxes que, anque son arquetípicos, tán enllenos de vida.
Les dos families, íntimes amigues y que llueu van a vese enfrentaes por unes actitúes ante la vida, tán gobernaes poles muyeres, Bittori y Miren, dos muyeres fuertes na que, el Destín o como queramos llamalo, da-y a una el papel de bona y a otra’l de mala, pero que, igualmente, pudiere ser al revés. El Txato, un home tranquilu, consecuente, que namás quier trabayar en paz y sacar unes perres pa la so familia. Joxian, de bon corazón y pocu espíritu. Los fíos de dambes pareyes: Nerea, Gorka, Joxe Mari, el Xudes que va a pagar cola cárcel la so simpleza y fuercia manipulada, y sobre toos ellos el personaxe d’Arantxa, la hermana de Joxe Mari y personaxe fundamental na novela sobre too pal so guapísimu final. Y como otru personaxe más: el pueblu. Onde se mueven conciencies, s’apunten falsos traidores, s’escuenden les envidies. El que dicta lo que ye bono y lo que ye malo. Poro, el que tamién dicta les sentencies de muerte.
Una novela, pues, totalizadora onde cada aspéutu d’esa llácara asesina que fue’l terrorismo d’ETA (y tamién del GAL, nun s’escaez nel llibru) tien la so referencia pa qu’entendamos, pa que xulguemos. Y too ello endolcao nuna historia superentretenida, que nos fai que la lleamos d’un tirón, que nun podamos dexala. Norabona a Fernando Aramburu, que llogró xuntar amenidá, claridá y rigor con un estilu cenciellu, cuasi como d’andar por casa. Esa difícil facilidá que tienen los grandes.
