Títulu: «Ávidas pretensiones»
Autor: Fernando Aramburu
Editorial: Seix Barral
Añu: 2014
EXERCICIU D’ESTILU.- Avalada pol prestixosu premiu Biblioteca Breve, de la editorial Seix Barral, llegó esta novela del famosísimu autor de «Patria» que, de la nueche a la mañana y por mor de la rellumante acoyida a ésta última, pasó de ser cuasi un desconocíu a convertise nuna celebridá. Pero Aramburu nun yera un don Naide cuando escribió la novela total sobre’l terrorismu etarra, sinon un escritor con una obra consolidada anque poco conocida del gran públicu. La prueba ye esti premiu que-y otorgó un xuráu compuestu, ¡na menos!, que por Caballero Bonald, Pere Gimferrer, Eduardo Mendoza, Elena Ramírez y Carme Riera.
En cuantes a la novela… bueno, ye una obrina bien escrita, con un estilu mui personal (dacuando ampulosu, dacuando coloquial), con munchu sentíu del humor, pero, en cualquier casu, una novela menor. L’autor guipuzcoanu introduz nun conventu de monxes a un variáu garapiellu de poetes, que van pasar ellí los tres díes que dura un alcuentru lliterariu, y depués ximielga la «coctelera» pa que se combinen de munches maneres. Hai nel grupu homosexuales, lesbianes, don Xuanes, reprimíos, tímidos, exhibicionistes y hasta un ciegu con ¡lazarilla! Y asina, les sos actitúes y conversaciones, dan muncha salsa al platu que nos prepara con ellos Aramburu. Pero too ello nun pasa de ser un divertimentu. Yo, polo menos, nun-y veo otres pretensiones anque, claro, el llibru nun ta esentu d’una sele crítica a esti tipu de certámenes y de «fauna» escritora. Lléese con agradu, consigue dalgunes sonrises y a la fin zarres el llibru y nun pienses más n’elli. Total, novela mui afayaíza pa llevar de viaxe o lleer na playa. Con eso dígolo too.
