Títtulu: «Veneno de cristal»
Autora: Donna Leon
Añu: 2008
Trad.: Ana Mª de la Fuente
Editorial: Seix Barral, S.A.
Siempre quixi que me prestaren les noveles de Donna Leon. Tienen tolos ingredientes pa qu’asina seya, escritora norteamericana afincada en Venecia. Hestories d’intriga. Un policía arquetípicu (l’inspeutor Brunetti) y la ciudá como un elementu más na trama de la hestoria. Y, ensin embargu, son unes noveles qu’esbarien sobre mi, que nun me cuayen. Ye más, alcuéntroles aburríes, y eso ye lo último que tien d’asoceder, coles noveles en xeneral, y con esti xéneru en particular.
En «Veneno de cristal», una anéudota dafechamente absurda, tiénnos al probe Brunetti de la ceca pa la meca, entrando y saliendo de bares y trattories, comiendo, bebiendo y falando con unos y otros ensin plizca d’interés nin emoción. Con una esculpia un tantu «ecoloxista», l’autora nun ye capaz de facer que nos enganchemos a la hestoria, quedando como únicu oxetivu del llector el del recorríu urbanu y de los canales, sobre too si la novela la llees en Venecia, como fue’l mio casu.
Una desillusión más (abúltame que la última) con una escritora renomada a la que yo nun-y alcuentro nengún aquel.
————————————————————–
Títulu: «Pronto»
Autor: Elmore Leonard
Trad.: Alberto Cascarelli
Añu: 1995
Editorial: Ediciones B
Tolo contrario de la novela de Donna Leon, esta Pronto (de la pallabra italiana) ye una hestoria potente, enllena de fuercia creadora, con unos personaxes consistentes y unos diálogos rellumantes, non en vano el veteranu Elmore Leonard ye un de los meyores «dialoguistes» de la nómina actual d’escritores.
Novela que se llee d’un tirón, l’argumentu desendólcase a medies ente Italia y Estaos Xuníos, plena de «tipos duros» pero con un mui personal xacíu del honor. De la so llectura podíemos entesacar una antoloxía de frases rotundes, enllenes d’un peculiar sentíu del humor. Danos pena llegar al final (un final sele, pa una hestoria fuerte) porque prestaríanos, daveres, siguir lleéndola.
Si daquién, entovía, nun conoz a Elmore Leonard, que merque esta novela. Apuesto dalgo a que s’engancha a él.
