Títulu: Anatomía de un instante
Autor: Javier Cercas
Editorial: Mondadori
Añu: 2009
Xubíu al cumal lliterariu pola so obra «Soldados de Salamina» (una crítica mui favoratible de Mario Vargas Llosa foi la responsable), Javier Cercas, filólogu, periodista y profesor de lliteratura na Universidá de Girona, presenta la so cabera obra siguiendo l’estilu y la estela d’aquella historia del soldáu republicanu que-y perdonó la vida a Rafael Sánchez Mazas, un de los fundadores de Falange, nun fusilamientu. Un estilu que participa del ensayu, el periodismu, la biografía y la lliteratura, nuna mecia de xéneros que l’autor remana con facilidá y comencimientu.
Nesti intre, el tema escoyíu por Cercas dexa de ser una cenciella anéudota, como nel casu anterior, p’afondar na basa d’un de los fechos más trescendentales de la moderna Historia d’España: L’intentu de Güelpe d’Estáu del 23 F. Y Cercas vuelve a movese pelos requexos de la intrahistoria con una habilidá y una precisión, como’l tópicu ciruxanu col bisturí. L’autor escalpela (perdóneseme l’inventu) los antecedentes del güelpe (lo qu’él llama la placenta), calumbándose dafechu na dificilísima situación pola que pasaba l’estáu, repasando un a un tolos estamentos que, dende l’odiu o la enemiga que-y teníen a Adolfo Suárez, conspiraben en mayor o menor midida pa dar «un güelpe de timón» a la política española. Un «güelpe» que, nel meyor de los casos, tendría de ser un güelpe «blandu», o seya un llamáu Gobiernu de Concentración o Salvación, dirixíu por un militar (Alfonso Armada) o, nel peor de los casos, un «güelpe duru», direutamente a la llinia de flotación de la democracia, con un Gabinete Militar a la cabeza de la política española. La Corona, los Militares, la Ilesia, los distintos Partíos Políticos, los Empresarios, los Sindicatos, la propia Sociedá civil… toos y caún d’estos estamentos son analizaos nes feches anteriores al 23 F. Depués, el desarrollu del propiu güelpe dende toles perspeutives posibles, incluyendo a la del CESID, los servicios d’intelixencia españoles que xugaron un «confusu» papel esi día. Pa finar, coles consecuencies posteriores del mesmu.
Pero’l llibru ye, sobre too, un analís perinteresante sobre la controvertida figura de Suárez, esi advenedizu a la democracia pero que, como’l personaxe de la película de Rossellini, El Xeneral de la Róvere, termina asumiendo’l so papel nesi instante del asaltu al Congresu. Esi instante que, como dicía Borges, supón el momentu en qu’un home sabe pa siempres quién ye.
Ensayu que se llee como una novela pues, pese que l’estilu del llibru ye concisu, cuasi cortante en dalgunos pasaxes, ta siempre cuntáu con un propósitu narrativu lliterariu, nun en vano Cercas pretendió, nun primer momentu, escribir una novela sobre’l tema. Allégrome que nun lo ficiere, el resultáu ye muncho meyor que cualesquier novela que pudiere escribir. L’únicu trabancu que yo-y pondría ye que, dalgunes veces, el llector nun estrema bien lo que son fechos probaos, cola mera opinión o, inclusive, intuición del autor, que llega a conclusiones personales, respetables, pero non obligatoriamente compartíes. Xunto a eso, dalgunes esaxeraciones históriques, como’l dicir que Santiago Carrillo, que d’aquella tenía 19 años, fue’l que «promovió» la Revolución d’Asturies de 1934 abúltame que ye «pasase» un poco.
Llibru, en tou casu, que recomiendo dafechu, porque nun encartia sólo pa los interesaos nos temes políticos o d’historia contemporania, sinón pa tenelu na nuestra biblioteca y, de xemes en cuando, echa-y una güeyada. Hai que valorar lo difícil que ye conquistar una democracia y lo fácil que ye perdela. Y a piques tuvimos.
