Títulu: «La Ilustración Asturiana»
Autor: Varios
Edición Facsimilar del añu 1904
Editorial: La Cruz de Grao
Añu: 2009
Trátase, como pue vese polos datos, de la reedición facsimilar d’una revista apaecía nel añu 1904, cuyu propietariu y editor fue don Edmundo Díaz del Riego. La revista nació en Muros del Nalón, del enfotu del so propietariu y de l’axuda d’un piñu d’intelectuales, comerciantes y prohomes amantes d’Asturies, de la so cultura, del so paisaxe, de la so gastronomía y de too cuanto pudiere representar l’ensalzamientu de la so tierra.
La revista tuvo una vida curtia, dos años, pese al ésitu nel so llanzamientu, nun sólo a esti llau del oceanu, sinón inclusive (o principalmente) del otru, pues la colonia asturiana n’América esperaba la salida de cada númberu con verdaderu interés. Pero, como suel asoceder, dificultaes na so financiación, punxeron fin a tan prestosa aventura. Don Edmundo falleció en Cuideiru, nel añu 1909, a los 38 años
Quedaron, nostante, pa la hestoria, un garapiellu de revistes qu’agora ven la lluz gracies al enfotu d’otru editor, contemporaniu, como ye César García Santiago y la so editorial La Cruz de Grao, nun númberu total de dieciocho, de les cuales asoléyense agora, nesti primer tomu, la metada d’elles.
El conteníu de la revista yera una mezclienda d’espacios fixos, empobinaos a biografíes de personaxes asturianos, a reportaxes d’actualidá, anuncies breves de Muros y otros conceyos y pueblos asturianos, reportaxes sobre fábriques, empreses, hestoria, fiestes, y tamién a creación lliteraria, con poemes, cuentos y rellatos curtios. Tenía, tamién, publicidá que, vista a los nuestros güeyos resulta mui «pintoresca» y una seición d’anuncios por pallabres. Too ello complementao por abondos grabaos y semeyes rellacionaes colos testos.
La llista de collaboradores ye numberosa y de calidá: Félix de Aramburu, Fermín Canella, Armando Palacio Valdés, Vital Aza, Bernardo Acevedo, Pérez de Ayala, Adeflor, etc. con collaboraciones n’asturianu a cargo de Pepín Quevedo, Marcos del Torniello, o’l propiu Bernardo Acevedo. En resume, un intentu, descentralizador ya interesante d’aportar una nueva revista cultural ya informativa al panorama asturianu de primeros del sieglu XX. Con esta edición facsimil somos a valorar l’esfuerzu d’aquelles persones que la ficieron posible. Pa finar, trescribo los primeros versos d’un llargu poema de Pepín Quevedo tituláu: Uviéu
Cuando Dios fizo’l mundu, y yá tien fecha,
al iguar les Asturies, aparóse
con cara satisfecha,
y la frente ensugóse,
y pa seguir alantre preparóse.
Y dixo pa entre sí: «Voi ver si esto
me sal lo que se diz perfeutamente,
entá meyor que’l restu»
y defetivamente,
y poques gracies siendo onipotente.
…………………………………………….
