Títulu: «Sólo te ahorcan una vez»
Autor: Dashiell Hammett
Traductores: Varios
Editorial: Seix Barral – Biblioteca Formentor
Añu: 2005
LOS ANICIOS D’UN CLÁSICU.-
Cuando falamos de «novela negra», o «xéneru negru», un par de nomes viénennos de sópitu al maxín. Un d’ellos ye siempres Hammett. Xunto con Raymond Chandler, James M. Cain, Jim Thompson o Chester Himes, por citar namás a dalgunos d’ellos, Hammett conformó esi universu, arreyáu a determinaos entornos de ciudaes americanes, de violencia, marxinalidá y corrupción, onde naveguen unos personaxes cuasi siempre solos, desraigonaos, de moral duldosa, pero que caltienen siempre y a pesar de toles circunstancies, una cierta ética personal. Unos ciertos «principios» de comportamientu. Nesi universu, Dashiell Hammett muévese como pez nel agua, dexándonos ayalgues tan guapes como «El halcón maltés», «Cosecha roja», «La maldición de los Dain» o «La llave de cristal». Conocedor perfeutu del tema, pol so trabayu como detective na famosísima Axencia Pinkerton, Hammett tuvo una vida mui interesante. Compañeru sentimental de la escritora Lilian Hellman, afilióse al Partíu Comunista y por ello foi condenáu pol Comité d’Actividaes Antiamericanes de Mac Carthy, pasando dalgún tiempu na cárcel. Varies de les sos noveles fueron llevaes al cine.
En «Sólo te ahorcan una vez», recuéyense por primer vez en volume diecinueve cuentos de la primera época de Hammett. Cuentos publicaos, dalgún d’ellos con alcuñu, en revistes y periódicos como Black Mask, True Detective Stories, y otres. El volume publicáu por Seix Barral resulta, al mio xuiciu, abondu irregular, como, per otru llau, paez lóxico. Tien coses interesantes, pincelaes que yá nos dan un anticipu de lo que llueu diba a facer, pero munchos cuentos resulten truncaos, inacabaos, confusos. Sé qu’esto va a paecer una «herexía» a los fans del escritor de Maryland, pero ye lo que yo pienso. Más paecen apuntes de noveles, ensayos d’escritura, probatures, que cuentos perfeutamente zarraos. Hai ente ellos, nun podía ser d’otru mou, dalgún interesante, y siempre, en toos ellos, destaca esi mou de dialogar tan direutu, tan corrosivu. Tamién paisaxes urbanos y personaxes, masculinos y femeninos bien trazaos pero, repito, la mayoría de los cuentos nun me llegaron a enllenar. Faigo esceición d’un cuentu maraviosu, una verdadera ayalga que me prestó pola vida, que lleva por títulu: «El hombre que mató a Dan Odams». Cuentu non urbanu, que podría valir como argumentu d’una película de vaqueros, y que ye un exemplu de precisión y economía de medios, onde too s’apunta d’un mou sele y onde los sentimientos, conteníos, aporten a un final lóxicu que ciarra’l círculu. Sólo por esti cuentu, paga la pena facese col llibru. Lo demás amuesa que, Dasshiell Hammett, cuando escribió estes histories, tovía taba un poco «verde».
