Títulu: «Profundidades»
Autor: Henning Mankell
Editorial: Tusquets Editores
Traductor: Carmen Montes Cano
Añu: 2007
LA FONDURA DEL ALMA HUMANA.- Ye esta una estraña ya inquietante novela. Estraña pola historia que cuenta, ya inquietante porque’l llector asiste, pasu ente pasu, a un descensu hasta los infiernos del protagonista de la mesma. Ye ésti un hidrógrafu que trabaya pa la marina de guerra de l’Armada Sueca, nel tiempu históricu de la Primera Guerra Mundial. L’hidrógrafu tien de llevantar un mapa de les profundidaes marines de les costes sueques, en cata de rutes accesibles pa los sos barcos. Home enamoráu de la so profesión, nagua por alcontrar un llugar onde la fondura del oceanu nun tenga fin, onde la plomada, esi instrumentu que venera y que lu acompaña inclusive pa dormir, nun toque fondu.
L’oficial Lars Tobiasson-Svartman tolo valora en distancies, pero eses distancies que siempre mide encartien, tamién, pa separtalu del restu del xéneru humanu. La falta de prosimidá cola xente, l’ausencia de contautu colos semeyantes, crea nél una solitú que-y enllena l’alma y lu cubre de cinismu ya indiferencia. Lars Tobiasson miente. Lars Tobiasson invéntase histories que faen dañu a la xente que lu quier y, claro, terminen faciéndo-y dañu a él tamién.
Nuna de les sos espediciones, alcuentra nun islote solitariu a una muyer que vive en condiciones mui primitives. Esa muyer va a ser clave na so vida. Siéntese atrayíu y, al empar, rechazáu por ella y, dende entós, nun va a tener reposu nin sosiegu. Engaña a la so muyer, engaña a los sos superiores, engaña a Sara Fredrika, la estraña muyer y, acaba engañándose a sí mesmu, nuna cayida a fondu semeyante a la qu’anda buscando pa la so plomada. La fondura del oceanu solo ye comparatible a la fondura de la so alma. «Entrugóse si podría dexar cayer la plomada a traviés de la escuridá qu’esistía baxo la superficie de tolos suaños». Pero la soga que fue texendo al so alredor termina por afogalu. Al final les mentires namás que lleven a una última mentira de la que yá nun pue salir: «Quiciás esi fuera l’únicu fondu ensin fondu pol que podía naguar. Fundise hasta la muerte, ensin conciencia de lo que asocediere una vuelta que los polmones se-y encharcaren col agua del mar».
Novela, repito, estraña pero d’una guapura que manca, y que te fai siguir lleendo hasta’l so dramáticu final. Una obra mayor del veteranu maestru Mankell, que sigue dándonos lleiciones de bona lliteratura.
