close
«Ex libris»

«Ex libris»

Títulu: Momentos estelares de la humanidad.momentosestelaresdelahumanidad

Autor: Stefan Zweig

Traducción: Berta Vias Mahou

Editorial: Acantilado

Añu: 2002

PA ENAMORASE DE LA HISTORIA.- L’escritor austriacu Stefan Zweig ye un gran ensayista, un prestixosu biógrafu y un interesante novelista. D’orixe xudíu, fue perseguíu polos nazis teniendo qu’esiliase n’Estaos Xuníos y Brasil, onde falleció nel añu 1942 ensin conocer la derrota d’Alemania. La so novela «Venticuatru hores na vida d’una muyer» fue definida por Gorki diciendo que «enxamás lleere nada más fondo». Pero a mi la que me prestó abondo fue «La partida d’axedrez», una novelina curtia, que se llee de tirón y na que resalta esa elegancia na escritura tan propia del autor vienés.

stefan-zweig1El llibru delantre del cuál tamos ye, como’l so títulu amuesa, un llibru d’historia. O meyor podríemos dicir, un llibru «d’histories», porque nun ye sólo un fechu históricu’l que se nos cuenta, sinón na menos que catorce. Como’l llibru tien malpenes trescientes páxines, podemos imaxinar que caúna d’eses histories ye curtia. Y yo amestaría: curtia pero escelsa. Nun se puen rellatar los socesos más importantes de la humanidá (a xuiciu, claro, del autor) con una mayor condensación y, ensin embargu, una mayor precisión. Pero nun se trata, como podría paecer, de «resúmenes». De cachos d’información histórica al rodiu d’un fechu importante. Nada más lloñe. Caún d’ellos ye narráu na so totalidá como si lu tuviéremos presenciando. Más entovía: como si lu tuviéremos presenciando ¡y nun supiéremos cuál ye’l final! De tal mou que da la impresión de que, en cualquier momentu, la historia que conocemos pue cambiar. Napoleón ¡pue ganar la batalla de Waterloo!  Los cristianos ¡puen llegar a tiempu de salvar a Bizancio del ataque de los turcos! ¡Scott pue llegar primero qu’Amundsen al Polu Sur…! Ta too cuntao con tal pasión y con tal maestría qu’ún, conocedor de la Historia, ye capaz de revivila con güeyos nuevos. Nun hai novela más apasionante qu’esti llibru d’ensayu.

D’ente estes catorce «miniatures históriques» (les subtitula’l llibru), hailes, lloxicamente, unes meyores qu’otres, o que pol so propiu conteníu resulten de más interés, pero toes elles caltienen un altor mediu mui eleváu. Personalmente les que más me prestaron fueron la de Cicerón, nel momentu en que se xugaba’l futuru de la República Romana; la de Waterloo, ya mencionada y, quiciás, la de la Marsellesa, pola curiosa contradicción que nella se da. Pero, repito, toes elles son merecedores d’una llectura.

Pa los que nun conozan a esti elegante, cultu y gran narrador, estos «Momentos estelares de la humanidad» son una perfeuta tarxeta de presentación.