Títulu: «Cualquier otro día»
Autor: Dennis Lehane
Editorial: RBA Libros
Traducción: Carlos Millá ya Isabel Ferrer
Áñu: 2010
El bostonianu Dennis Lehane, pese a ser un de los meyores narradores norteamericanos, nun tien ente la xente’l predicamentu d’otros que «suenen» más, pero que son nidiamente inferiores a él. Autor d’una riestra de noveles policiaques y d’intriga, la primera de les cuales foi «Un tragu enantes de la guerra», algamó popularidá con «Mystic River», nun tanto pola novela en sí, sinón pola adautación que pal cine fizo Clint Eastwood. Pudo ser una casualidá. Pero cuando asoleyó «Shutter Island», pudimos ver lo bon escritor que yera. Nun conozo la versión cinematográfica de Martin Scorsese, anque yá digo de mano que Leonardo DiCaprio nun me pega nada pal papel de «mocín», pero tampoco nun quiero prexulgala. Novela-trampa, onde nada ye lo que paez, con abondes implicaciones sicolóxiques, sorprende al llector en cada capítulu abocándonos a un final inesperáu pero comprensible.
Esta nueva entrega del autor de Dorchester (Bostón), nun tien nada que ver coles otres dos. «Cualquier otru día» ye una novela muncho más «épica», por llamala de dalgún mou. Allugada nel marcu de los años siguientes a la Primer Guerra Mundial, años convulsos, nos que los trabayadores movíense per tol país en cata d’un trabayu, mentanto xorrecíen los estremismos, los atentaos anarquistes y les inxusticies sociales y raciales. Con esti panorama de fondu, la novela cuenta la historia d’un policía, Danny Coughlin, fíu d’un famosu Capitán de la Policía de Boston, que trata de defender los derechos de los sos collacios, maltrataos por alcaldes, gobernadores y otros políticos, mientres va descubriendo que munches de les persones a les que s’acusa d’estremistes o bolcheviques, son trabayadores desesperaos que tienen razón na mayoría de les sos denuncies. Xunto con otros compañeros policíes, deciden entamar una güelga, dafechamente incomprendida poles autoridaes y pola so propia familia. Nun puedo cuntar más.
Xunto a esto, otra historia paralela, pero qu’acaba amestándose. La d’un trabayador negru, que vien fuxendo del sur por un problema rellacionáu cola «mafia» llocal, y que s’asitia en Boston buscando principiar una nueva vida. Los caminos de los dos personaxes van xuntase, nunos momentos decisivos pal futuru de los trabayadores y de la propia ciudá que los acueye. Hai tamién, entellazaes, unes perguapes histories d’amores/desamores, y la presencia d’un ídolu del Baseball, personaxe que fai un poco de testigu de lo qu’asocede, ensin tener conciencia nidia de lo que ta pasando. Too ello fai de «Cualquier otru día» una novela de llectura apasionante, a la vez qu’afonda nuna época revolucionaria que va a conducir, yá fuera del marcu de la novela, cola execución de Sacco y Vancceti, los dos anarquistes condenaos, con prebes mui pocu fiables, nel añu 1927. Les setecientes y picu páxines de la novela, lleense d’un tirón. Dafechamente recomendable.
