close
«Ex Libris»

«Ex Libris»

2011-08-03360Visitas

Títulu: «1001 libros infantiles que hay que leer antes de crecer»1001-libros-infantiles-que-hay-que-leer-antes-l-1

Autores: Quentin Blake y Julia Eccleshare

Traductores: Varios

Editorial: Grijalbo

Añu: 2010

UN LLIBRU DE CONSULTA PERNECESARIU.- Pa los que tamos interesaos na Lliteratura Infantil y Xuvenil (LLIX) y queremos, na midida que podemos, tar al día nesti bayurosu mundu viennos perbién un llibru como ésti. Nel, ordenaos per orde d’edaes, y dientro de cada edá pola fecha de publicación, podemos atopar una reseñina mui valiosa de caún de los llibros. Nella figura’l títulu del llibru, los nomes del autor/a ya illustrador/a, un cachín del argumentu y una valoración personal de too ello. Nun sé si son, satamente, mil y un los llibros reseñaos (nun tuvi l’humor de cuntalos) pero sí puedo dicir que nes cuasi 1000 páxines d’un papel mui curiosu, colos dibuxos de les portaes en color, tán la mayoría de los llibros y autores que podemos llamar «imprescindibles».

Los autores, porque nun son sólo recopiladores, sinón qu’hai muncho de producción propia son, Quentin Blake, illustrador perfamosu, ganador del «Nobel» de la LLIX (el Premiu Andersen) y mui conocíu por facer los dibuxos de los llibros de Roald Dahl, y la escritora y editora inglesa Julia Eccleshare, prestixosa nel mundu enteru y ganadora tamién d’abondos premios.

Nun llibru d’estes carauterístiques ye imposible que tea too. Poro, podíemos echar en falta a dellos autores o títulos que merecerían sumase a esos otros reseñaos. Dígolo porque, por exemplu d’España, que pue ser lo que yo meyor conoza, falten unos cuantos «pesos pesaos» de los escritores contemporanios: Sierra i Fabra, Farias, Gisbert, Moure, Atxaga, etc. pero, como digo, sedría imposible reseñalos a toos. Pola contra, sí vienen (de xuro porque son menos) los que podíemos llamar clásicos infantiles españoles, como Borita Casas (la d'»Antoñita la Fantástica») o Elena Fortún (la de «Celia»). Tamién el Padre Coloma («El Ratón Pérez» publicáu en 1894). Y, en cambiu, sorprende dalgún autor incluyíu (polo menos a min), como ye’l casu de Laura Gallego, una autora que, si ye verdá que vende muncho, nun creo que tenga méritos pa figurar nun llibru como ésti.

En resume, un estupendu llibru pa los enfotaos nel tema. Sólo pasar la vista penriba de tantos grabaos tan guapos, y echar una güeyada a esos autores de siempre, paga la pena facese con un exemplar. Recomiéndolu.