Títulu: «¡Todo importa!»
Autor: Ron Currie
Traductor: Pedro Donoso
Editorial: Seix Barral, Biblioteca Formentor
Añu: 2011
UNA PRECIOSA TRISTURA.- Con sólo dos noveles, la primera, que yo nun lleí, «Dios ha muerto», y esta segunda que reseño güei, el norteamericanu Ron Currie (Waterville, Maine) ta dando que falar, y muncho, a los críticos de mediu mundu. Na solapa del llibru anúnciase la so publicación en 12 paises. Esto nun ye garantía de nada. Esisten verdaderes «naderíes» que se reparten ediciones como cuentu risa. Y ye que una bona promoción, con munches perres emplegaes en publicidá, dan como resultáu eses ventes supermillonaries y esos fenómenos lliterarios que, como diz el refrán asturianu, «al cocer mengüen».
Nun ye esti’l casu de «¡Todo importa!», una espléndida novela, estraña, llúcida, sensible, humana, con un de los finales más guapamente tristes que yo lleí. Un final que valdría por toa una historia, pero que nun ye sinón una continuación de lo que se nos vien contando: la vida de Junior Thibodeau, un xeniu al que nel momentu de nacer una voz plural revéla-y una abegosa profecía: dentro de 36 años, el planeta Tierra desapaecerá al chocar escontra ella un meteoritu. Junior tien que llevar a recostín esa enorme carga, rellativizando tolo que pasa al so alredor porque, qué importa nada si too va a finar unos pocos años depués. Pero Junior dirá descubriendo que, como diz el títulu, «todo importa». Y puesto que toos vamos morrer, anque nun sepamos cuándo, hai que procurar facer d’esti mundu un llugar meyor y, sobre too, aprovechar pa querer a les persones que viven con nos, a les que nos quieren.
La novela tien un narrador coleutivu, esa voz plural (porque fala de «nosotros») que se-y revela nel momentu de nacer, pero llueu caún de los personaxes de la historia fala tamién en primer persona, sorprendiéndonos munches veces coles reflexones que faen y desanubriendo aspeutos que, a los demás, pásen-yos desapercibíos: so padre, personaxe riquísimu, patéticu nel so afán de caltener la propia dignidá; so madre, abellugada nel alcohol; el so hermanu Rodney, entrañable trunfador, cuasi ensin querelo y la so moza, Amy, contrapuntu de so, persona llúcida, reflexiva ya intelixente. Un puñáu de maravioses persones que te conmueven.
Los xuegos lliterarios, les sorpreses narratives, les posibles histories alternatives, faen de la llectura de ¡Todo importa! un placer y un descubrimientu. Recomiendo encesamente la so llectura porque, toi seguru, a naide nun defraudará. Y agora quedo emplazáu pa buscar esa otra novela anterior del mesmu autor, cola seguridá de que, un narrador de semeyante calidá, nun pue ser frutu d’un día nin d’una obra.
