Títulu: «Caligrafía de los sueños»
Autor: Juan Marsé
Editorial: Lumen
Añu: 2011
LA MESMA HISTORIA DE SIEMPRE.- Juan Marsé ye un de los mios escritores favoritos, dígolo yá de mano pa que se sepa. Tengo lleídes la mayoría de les sos noveles y aprovecho pa recomendales, anque hai quien diz que ye un escritor irregular (que lo ye) y qu’escribe una novela bona y otra mala, nun ciclu que se repite ad infinitum. Pero yo creo que más qu’un escritor irregular, Marsé ye un escritor d’una sola historia. Lo qu’asocede ye que cuéntala tan bien, que nun te da más que too te suene a conocío. «Caligrafía de los sueños» nun ye una esceición: tolo contrario. Equí ta la Barcelona de posguerra, centrada na llende del barriu de Gracia y los contornos del Parque Güell. Un barriu amiseriáu, de cais puerques y escures, nes que los seres que lu habiten lluchen por sobrevivir, por tener un poco, sinón de felicidá, que podría paecer una utopía, sí de paz. D’ente esos personaxes, saca Juan Marsé a los sos protagonistes. En primer llugar, a los rapazos que tienen el so habitat neses cases probes, de les que traten de fuxir inventando «les aventis», eses histories que se cuenten, nes qu’ellos son los protagonistes d’aventures nel «far west», o nalguna serie negra de policíes y lladrones. Y tán llueu los «fugaos», los represaliaos o los qu’anden ente dos mundos, como’l padre de «Ringo» que, claro, nun se llama «Ringo». El capitán «Matarratas» (la so profesión), qu’apaez o desapaez faciendo nun sé sabe mui bien qué (o sí se sabe), ente Barcelona y Canfranc. Y les muyeres, que tienen que sacar alantre a la casa y a los fíos, porque los maríos nun tán, o cuando tán son unos inútiles o la guerra los dexó tocaos material o espiritualmente.
Marsé trata a tou esti mundu con cariñu, con esi cariñu que tien hacia los perdedores, a los que sabemos que nun van llegar a nenguna parte, que se conformen con sobrevivir y aruñar, cuando puen, dalgún cachín de felicidá, echando un baille nel «Verdi» o na «Cooperativa La Lealtad», o tomando una copa nel «Rosales», que ye, en realidá, la exa de la novela, onde’l nuestru «Ringo» pásase les hores muertes suañando con ser músicu, y persabiendo que nun va a poder selo nunca. O pensando en Victoria, esa moza que nun-y gusta, pero lu atrae. La mirada de Marsé sobre toes eses persones ta enllena de tristura y de señaldá, pero también de sentimientu: La Vicky, colos sos suaños d’amor con Alonso, futbolista frustráu del Europa; la Paqui, xenerosa tabernera, siempre dando palique a los clientes: Berta la madre de «Ringo», muyer entera que, como toos llucha por sobrevivir nun mundu que los echa a un llau, que los emburria. La pandilla de «Ringo»: Quique, el Chato, Roger, Julito Bayo… de los, que pasu ente pasu, va separtándose, porque toos se faen mayores y surden otres obligaciones. L’autor, consciente de la repetición de paisaxes, personaxes y carauteres, faise un guiñu a a sí mesmu, sacando a un personaxe d’una novela anterior («El embrujo de Shangai»), como ye’l Capitán Blay, al que fai apaecer paseando otra vuelta pol barriu, pa dicinos que yá sabe, que sabemos, que ye la mesma historia de siempre y que piensa seguir contándonosla. Y yo, dende llueu, voi seguir lleéndola.
