Títulu: «Fiebre en las gradas»
Autor: Nick Hornby
Traductor: Miguel Martínez-Lage
Editorial: Anagrama
Añu: 2011 (1ª edición del 2008)
SUAÑOS DE FÚTBOL.- Los que somos futboleros declaraos (hai munchos que disimulen y dicen que ven los documentales de la 2) tenemos unes pautes de comportamientu mui asemeyaes. A nun ser esos bárbaros qu’empleguen esti deporte (o cualquiera) pa dexar salir la so brutalidá, el restu sufrimos cuando pierde’l nuestru equipu favoritu y allegrámonos, d’un mou que nun nos allegra tanto nenguna otra cosa, cuando ganemos, sobre too si ye a un de los «grandes» o un partíu de rivalidá. Poques coses son más prestoses que derrotar al Real Uviéu o al Real Madrid, y cuido qu’a los d’Uviéu pasará-yos lo mesmo.
Poro, al lleer esti llibru d’un forofu del Arsenal, ún tien que proclamar que s’apauta dafechu con cuasi tolo que diz y la forma en que lo fai. Ye, pues, un llibru principalmente pa forofos (l’equipu da igual), pero que pue ser lleíu por cualquiera cola seguridá de que va a pasar un cachu mui entreteníu. El llibru ye simpatiquísimu, y nun podemos más qu’identificanos con esi probe paisanu pal que la selmana ye una perda de tiempu ente dos partíos.
«Fiebre en las gradas» va faciendo un percorríu pola vida del autor, dende que so pá empieza a llevalu a Hihgbury (el campu del Arsenal), hasta que ya tien una edá madura que podría tenelu fecho un poco seriu, pero que nin con eses fue a cura-y esi mal que tou forofu lleva dientro: la so afición estrema al equipu de la so ciudá, del so pueblu. El que sos padres se separen, el que so padre forme una nueva familia y el tenga hermanos «postizos», los sos estudios universitarios, el so primer trabayu de profesor… van pasando peles páxines del llibru como telón de fondu, como «marca d’agua» d’unos socesos más importantes, que son la derrota ante el Liverpool, o la victoria frente al West Ham. Como tien que ser.
La narración ta enllena d’agudes reflexones sobre la vida y sobre la muerte (éstes son perrerísimes) y yo, que ya nun voi al campu dende va munchos años, siento un tastu de señaldá lleendo les aventures/desventures de Nick Hornby, col que me prestaría asistir un día a les grades de Highbury. Porque termina siendo como un amigu.
