Títulu: «La defensa de Madrid»
Autor: Manuel Chaves Nogales
Ediciones Espuela de Plata
Añu: 2011 (del orixinal publicáu na revista mexicana «Sucesos para todos» en 1938
UNA BIOGRAFÍA (SENTIMENTAL) DEL XENERAL MIAJA.- Son los primeros meses del llevantamientu militar escontra’l llexítimu gobiernu de la Republica. Les tropes «nacionales» avancen, cuasi ensin oposición, percorriendo media España hasta llegar a les puertes de Madrid. Les tropes republicanes, formaes mayormente por xente del pueblu (los pocos militares lleales a la República tán baxo sospecha), retroceden, cuando non fuxen a la desbandada, delantre d’un exércitu profesional a cuya cabeza van los moros, los regulares y la lexón. Tamos a primeros de Payares de 1936. Faen un pequeñu altu pa recuperar el fuelgu y principiar l’asaltu final, mentantu’l Gobiernu Republicanu decide treslladase (nuna especie de «sálvese quién pueda») a Valencia pa nun cayer presu, no que se piensa que va a ser una entrada inmediata de los fascistes na capital. La ciudá queda al mandu d’un vieyu xeneral, gordu y con poca presencia: el Xeneral Miaja. Y, ensin embargu, va a ser esti xeneral el que, cola so capacidá d’organización, de mandu y, sobre too, cola so presencia d’ánimu, va a insuflar l’aliendu necesariu y a sentar los sofitos pa que Madrid resista («resistir ye ganar»). Nun sólo eso, sinón que dende’l puntu de vista internacional supunxo el primer «detente» que se-yos dio a los fascistes n’Europa. Aquel «Nun pasarán», fízose l’eslogan del pueblu madrilanu que se caltuvo hasta que, yá cola guerra práuticamente finada, en Marzu de 1939, consiguió l’enemigu penetrar nella.
Manuel Chaves Nogales, periodista y escritor, ta en Madrid neses feches y, pocos meses dempués, yá nel esiliu, cuéntanos toles circunstancies d’esa heróica defensa y de les persones que la protagonizaron. Meyor, de LA PERSONA que la protagonizó. Porque Chaves Nogales lo que fai en realidá, ye una biografía de Miaja. Escritor apasionáu, del que nel so día (en Mayu del 2009) recoyí n’otru «Ex libris» el so maraviosu volume de cuentos «A sangre y fuego», tocáron-y pa vivir unos años terribles y apasionaos que’l supo rellatar nes sos cróniques periodístiques y nos so cuentos. Nesta obra, publicada n’entregues nun periódicu mexicanu cuando entovía nun taba acabada la guerra, l’escritor sevillanu fainos participar d’aquelles decisives selmanes del asediu de la capital d’España, que yera más qu’una ciudá, un símbolu pa la República, pero tamién pa tolos antifascistes del mundu, una parte de los cuales atoparon la muerte ellí defendendo los sos ideales escontra’l fascismu.
Chaves Nogales biografía al Xeneral Miaja, bordeando cuasi la haxografía, y nun cayendo nella pola so alta calidá lliteraria y pola visceralidá de lo que cuenta: magnífico y terrible. El llibru ta enllenu d’aneudotes y de personaxes secundarios maraviosamentu descritos y de frases rotundes puestes, la so gran mayoría, en boca del so biografiáu, como n’aquella ocasión qu’un de los xefes que defenden les posiciones avanzaes na Ciudá Universitaria-y entruga que si l’enemigu toma aquella posición, a ónde se retiren. A lo que’l xeneral contesta: «Al cementeriu». Pero a Chaves Nogales nun lu ciega la pasión republicana, y asina critica amargamente la fuxida del gobiernu, la violencia, los «paseos» y los asesinatos de los primeros díes del asediu, la postura de los sindicatos d’atropar armes y alimentos pa los suyos, el corporativismu y el pocu enfotu en salvar a la República d’unos y otros…
Trátase d’un llibru, pues, que vien a complementar a los yá munchos escritos sobre’l tema, pero qu’aporta una visión mui personal de los fechos y, penriba de too, que los cuenta col apasionamientu del que los vivió en primer persona. Eso, al mio xuiciu, da-y un valor añadíu que nunca nun podrán tener los testos del historiador qu’escribe pasáu’l tiempu, dende’l so fríu despachu d’investigador.
