Títulu: Un mundo infernal
Autora: Daphne du Maurier
Torna: Carmen Santos
Editorial: Luis de Caralt, S.A.
Añu: 1966
LES HERMANES BRONTË AL DESNUDU.- Tuvi noticia d’esti llibru per una referencia del escritor Juan Tébar na revista CLIJ. Falaba él d’una biografía de les hermanes Brontë, escrita por Daphne du Maurier, albidrando que’l llibru debía tar agotáu va tiempu. Interesóme dende l’aniciu. Per un llau porque’l mundu de les hermanes Brontë, polo que yo sabía, fuere mui dramáticu, enllenu de muertes prematures y circunstancies novelesques, y per otru, porque qué meyor narradora pa falar d’esi mundu que l’autora de la clásica «Rebeca», qu’inclusive fue acusada (ensin xustificación dalguna) de plaxar el «Jane Eyre», de Charlotte Brontë. Asina que tenía d’atopar el llibru y eso fue lo que fici.
El títulu esautu del orixinal inglés ye The infernal world of Branwell Brontë, que ye muncho más afináu pues la biografía (dalgo novelada) de les hermanes, vien a traviés de la tormentosa vida del únicu varón de la familia, Branwell, muertu con 31 años. Pero esta biografía ye muncho más qu’una mera esposición de datos y llugares. Du Maurier, que remana una amplísima documentación, yo diría que cuasi esaustiva, afonda na personalidá de caún de los miembros de la familia y, sobre too, de les rellaciones que tuvieron ente sí. De les cinco neñes nacíes, les dos mayores María y Elizabeth, morrieron n’ estrañes circunstancies nel colexu onde taben internes, nel plazu d’un par de selmanes. Imaxinemos la impresión causada nel restu los hermanos: la mayor Charlotte, el segundu Branwell, la tercera Emily y la pequeña Anne.
Charlotte y Branwell tuvieron una rellación mui fonda, y fueron los que crearon el so «mundu infernal». Con una imaxinación desbordante, inventaron un país imaxinariu (Angria) al que, pasu ente pasu, fueron enllenando de personaxes, llugares, paisaxes… completando docenes de cuadernos escritos con lletra menudo, onde diben espeyando coses o persones de la so vida real, tresformándoles, rellacionándoles ente sí. Emily tamién participaba, dacuando, d’esi mundu soterrañu, nel cual s’abellugaben los hermanos pa fuxir d’una realidá que nun-yos prestaba muncho.
Lo curioso fue que les tres hermanes trunfaron llueu como escritores, mentanto Branwell, l’alma mater de la idea, vio refugaos tolos sos intentos lliterarios porque, dotáu de una gran imaxinación y riqueza interior, nunca nun fue a plasmala nuna obra lliteraria de calidá. Charlotte fue la más reconocía de les hermanes, anque tuvo que publicar «Jane Eyre» con un alcuñu masculín (Currer Bell). Emily nunca nun llegó a saber el trunfu que diba a tener la so novela «Cumbres Borrascosas», anque en vida d’ella yá tuvo dalguna bona crítica. Y la pequeña, Anne, tuvo que se conformar con menores allabances, anque les dos noveles qu’escribió («Agnes Grey» y «La inquilina de Wildfell Hall») tán siendo agora revalorizaes. Bronwell, afectáu pel alcohol y per una especie d’epilepsia, tuvo un descensu de verdá a los infiernos, lloñe d’aquel otru lliterariu compartíu coles sos hermanes. Él creíase perfechamente dotáu pa trunfar, na poesía o na pintura (fue un aceutable dibuxante y pintor) y nun supo llevar les negatives d’editores o centros d’arte hasta la so muerte tráxica. Tampoco Emily y Anne vivieron muncho más pa cellebrar la so fama, pues fallecieron enantes de los trenta años, con un espaciu de meses, y Charlotte, que llegó a casase, tamién les acompañó ensin llegar a cumplir los cuarenta.
Daphne du Maurier describe too esto con puxu y precisión, anque al mio xuiciu abusa demasiao del usu de testos lliterarios de los Brontë, que nun yeren imprescindibles pa la historia y ralenticen dalgo la llectura. En cualquier casu, ye una interesantísima biografía, dafechamente recomendable, d’una escritora a la qu’homenaxeé en silenciu na mio novela «Fontenebrosa II. La rebelión de los Homosaurios». Recordemos que la so famosa novela «Rebeca» anicia asina: «La noche pasada soñe que había vuelto a Manderley…». Pues bien, yo emprimé’l capítulu I de la mía asina: «Aquella nueche volvió a suañar con Fontenebrosa…». Cuento esto pa los amantes de la «intralliteratura», y pa dexar nidia la mio almiración pola escritora británica.
