Títulu: «El sentido de un final»
Autor: Julian Barnes
Torna: Jaime Zulaika
Editorial: Editorial Anagrama, S.A.
Añu: 2011
UNA GRAN NOVELA.- Dicir que tengo una «querencia» polos escritores británicos sedría una «frivolite», sinón fuere una verdá que pue constatase. La mio modesta biblioteca tien un númberu considerable d’ellos, dende los más vieyos (De Foe, Stevenson, Conan Doyle, Henry James…), hasta esa xeneración que podía principiar con Graham Green, siguiendo por Anthony Burgess y finando con nomes como Ian McEwan, David Lodge, o Martin Amis que, anque mui distintos y distantes, tienen unes peculiaridaes que me los faen atrautivos. Julian Barnes ye ún de los últimos porque, anque la so edá anda pareya cola mía (o seya, «talludín») sigue escribiendo y ganando premios, como lo amuesa esta cabera novela suya qu’acaba ganar el prestixosísimu «Booker», al que yá tuviere nomináu n’otres tres ocasiones.
Y, ensin embargu, por una riestra casualidaes que nun son del casu, ye ésta la primer novela suya que lleo. Y digo, yá de mano, que namás con ella ya m’encartia pa ponelu nesi «altarín» que tengo in mente pa los mios escritores favoritos, porque atropa pa sigo toles carauterístiques que me presten y que lu comparen con dalgunos de los enantes citaos: una escritura aparentemente cenciella, gran sentíu del humor, capacidá de conocer eso que se llama «el corazón humanu», bonos, anque escasos, diálogos y una fonda reflexón sobre los temes que más nos esmuelguen, o polo menos que más m’esmuélguen a mí. L’amistá, l’amor, la muerte, la relixón, la lliteratura…
Tony Webster, el protagonista d’esta novela, ye un profesor de Historia yá xubiláu que recuerda los sos años d’adolescencia nel institutu y la universidá, onde formaba «pandilla» con otros dos amigos. Un nuevu miembru xúnese a esos «tres mosqueteros», pero anque comparte coses con ellos, ye «distintu». Fríu, cultu, intelixente, paez predistináu a facer grandes coses na vida pero… un día esbáyase too eso. Munchos años depués, Webster recuerda aquel socesu puestu d’actualidá por una carta y un diariu que recibe de sópitu. Y, de dalgún mou, aquella revisión de la so vida va a da-y una nueva interpretación de los fechos que yá paecíen desplicaos.
«El sentido de un final» ye una novela que mecia, con intelixencia, simpátiques anéudotes escolares con fondes reflexones sobre la vida y la muerte. Y plantega nueves entrugues a los problemes cotidianos de la xente: ¿pue revivise un amor abandonáu cuarenta años atrás? ¿Tamos, en dalgún momentu, a salvo de que nos algame’l nuestru pasáu? En tola novela llate, amás, un sentimientu mui propiu d’esa xeneración, sobre too en dellos autores como por exemplu Graham Green, que ye’l sentimientu de «culpa». Una culpa por coses qu’asocedieron, a otros o a nós mesmos, y qu’un día tornen picando na nuestra puerta y emplazándonos a una rempuesta.
L’agudeza de les observaciones más nidies, la descripción de los personaxes, la elegante prosa emplegada, faen d’ésta una gran, anque curtia, novela, y al so autor un de los grandes escritores británicos de la época. Recuperaré’l tiempu perdíu lleendo otres coses suyes porque, de magar agora, ya lu tengo puestu colos mios «grandes».
