Títulu: «Alabama Song»
Autor: Gilles Leroy
Torna: Mª Teresa Gallego Urrutia
Editorial: RBA
Fecha: 2009
UNA INTERESANTE BIOGRAFÍA.- L’autor francés Gilles Leroy ganó’l prestixosu premiu Goncourt, l’añu 2007, con esta biografía d’un personaxe que a mi siempres me paeció interesante, anque nunca llegare a conocelu bien: Zelda Sayre, tamién conocida como Zelda Fitzgerald, o seya, la muyer del gran Francis Scott Fitzgerald. Muncho se sabe de Scott, del so ésitu lliterariu y social, un ésitu, por cierto, efímeru pues los caberos años de la so vida, y morrió con 44, ya yera un ídolu cayíu, somorguiáu nel alcohol y l’escaezu. Pero que dexo media docena d’obres importantes que, tiempu depués, entovía se siguen lleendo y utilizando como material pal cine. Y como exemplu, esta última versión d’ «El gran Gatsby» con Leonardo DiCaprio como «mocín», como primero lo fue na menos que Robert Redford.
Ensin embargu, muncho menos conocida ye la historia de la so muyer, una historia dramática, dura y murnia, como la rellación que dambos tuvieron nel tiempu que vivieron xuntos. Zelda yera miembru d’una importante familia sureña, fía d’un xuez del Tribunal Supremu y nieta d’un senador, mientres que Scott yera un guapu teniente, pero con una mano alantre y otra atrás. O seya, ensin oficiu nin beneficiu, a nun ser unes ciertes cualidaes pa la escritura y pocos escrúpulos pal ascensu social. Durante un tiempu fueron la pareya de moda en norteamérica, porque ella yera mui poco convencional, o seya, mui llibre de comportamientos y creencies, y él principiaba a trunfar colos llibros. Total, que se los rifaben en fiestes y «saraos». Pero la cosa ente ellos nun funcionó y emprimaron a dir de mal en peor, nuna cuesta abaxo inaparable.
El llibru de Leroy, escritu en primer persona, como si fuere la propia Zelda la que fai la so autobiografía cunta, más bien, la parte del descensu a los infiernos d’esa muyer intelixente, culta y desinhibida, que tuvo un amante (un aviador francés) al que quixo daveres, y a la que’l so maríu maltrató sicolóxicamente hasta dar col so cuerpu n’infinitos manicomios, entrando y saliendo como si fueren hoteles. Zelda tamién escribía, y munches de les idees de les noveles d’él, son tomaes de notes y diarios d’ella, a la que nun dexaba publicar col so nome porque dicía que-y pagaben menos, y que yera meyor que firmara él. Pintora, baillarina frustrada de ballet, escritora, Zelda Fitzgerald fue una muyer llúcida y atormentada que finó odiando a Scott, ensin dexar de querelu, de xuro en recuerdo d’aquel «desllumamientu» que dambos tuvieron nel aniciu de la rellación.
Gilles Leroy cuéntanos esi descensu a los infiernos con sentimientu y calidá lliteraria. Sicasí queda un poco curtiu en dalgunes partes de la vida de Zelda de les que malapenes cunta nada. Y, per otru llau, la narración en primer persona sirve p’alleganos el personaxe y facer que lu sintamos mui prósimu, pero tien el defeutu de que ún nun sabe cuando lo que se diz ye de la propia Zelda, o del que, nel so nome, escribe la historia. Pero bono, son pequeñes pexigueres que nun empañen, n’absoluto, la bondá d’un llibru interesante y mui bien escritu. Y zarro col primer párrafu de la novela, puestu en boca de la protagonista, ensin saber si ye orixinal d’ella o del propiu Gilles: «Hay quien se esconde para robar, para matar, para traicionar, para amar, para gozar. Yo tuve que esconderme para escribir. Con apenas veinte años caí bajo la autoridad -el autoritarismo- de un hombre poco mayor que yo que quería gobernar mi vida y se dio muy mala maña». D’eso trata esti llibru.
