Títulu: «Las leyes de la frontera»
Autor: Javier Cercas
Editorial: Mondadori
Añu: 2012
LA FRONTERA AZUL.- La trayeutoria lliteraria de Javier Cercas vien alteriada por un fechu concretu: la opinión amosada pol Nobel Mario Vargas Llosa sobre la so novela «Soldados de Salamina», nel sen de dicir que yera una de les meyores obres que lleere nos caberos tiempos, opinión, nel mio humilde criteriu, desmesurada. En cualquier casu, Javier Cercas, que yá tenía publicaes otres noveles que pasaren ensin pena nin gloria, conoció un tiempu de superventes hasta’l puntu de reeditase esa novela cola fras de don Mario incorporada. Allégrome. Ye una novelina entretenida, d’un tema que siempres m’interesó (el rellacionáu cola Guerra Civil) y bien escrita. Depués d’ella los llectores esperamos sollertes l’apaición d’un nuevu títulu del autor, que llegó na forma d’un estudiu noveláu sobre l’intentu de güelpe d’estáu del 23 F: «Crónica de un instante». Llámolu «estudiu noveláu», anque’l llibru nun tien ficción, porque la so estructura y el mou de tar cuntáu, avérase más a una novela de suspense que a un ensayu históricu. El llibru nun sólo nun defraudó, sinón que tuvo unes mui bones crítiques, ente elles la mía, y llegó a algamar dalgunos premios.
Llega agora’l caberu llibru de Cercas tituláu «Las leyes de la frontera», una novela, esta vez sí, que recueye la vida d’un delincuente adolescente , «el Zarco», dende los sos primeros tiempos con una banda de rapazos de 16 años, hasta la so muerte na cárcel cuarenta años depués. La novela nun cuenta, claro, tola vida del Zarco, sinón tres momentos puntuales, con saltos grandes nel tiempu, anque se despliquen tamién les otres vicisitúes, resumiéndoles pa conocencia del llector. La disculpa del argumentu ye l’interés d’una editorial d’escribir la historia del delincuente, una vez muertu, aprovechando l’últimu «tirón» mediáticu del acontecimientu. Enantes, nos sos mayores años de gloria, fuere un personaxe mediáticu al que se lu facía apaecer como una víctima de la sociedá (tamos nos años de la «transición») que poco menos que lu obligare a ser como fue: lladrón de coches y de bancos, que pasó cuasi tola so vida na cárcel, onde protagonizó motines, fuxíes, güelgues y demás actos de rebeldía social, lo que dio pie a escribir sobre él varios llibros y facer dos o tres películes, dalguna interpretada por él mesmu. El personaxe, más o menos noveláu, esistió daveres embaxo’l nome del «Vaquilla», anque abúltame que Cercas fai una versión mui llibre del mesmu.
Pero lo que a min más me prestó de la novela nun fue tanto la vida del Zarco y la so socesión d’actos delincuentes o de rebeldía, sinón la historia d’amor protagonizada por otru personaxe de la banda, el «Gafitas», y la supuesta pareya del Zarco, Tere, que ye al mio xuiciu la verdadera «mocina» de la historia y el personaxe más interesante. El «Gafitas» ye un rapaz de familia media, nada que ver col mundu de los quinquis nel que se mueven los otros, y que se mete na banda por dos motivos: la humildación que sufre nel colexu, onde un grupu de compañeros lu maltraten, y sobre too, pol amor de Tere de la que queda «engancháu» dende la primer vez que la ve. «Yera la moza más guapa que nunca nun viere», llega a dicir nun momentu. Esi amor del «Gafitas» por Tere, y les distintes rempuestes qu’esta-y va dando, ye la parte más guapa de la novela. Porque’l rapaz, rescatáu per una estraña circunstacia d’esi mundu de droga y marxinación, faese llueu abogáu y termina defendendo a un Zarco ya mui maltratáu pola vida. Pero eso failo tamién por Tere, pol so amor por ella que sigue a lo llargo’l tiempu anque, como nos grandes amores lliterarios, ténganlo too en contra d’ellos.
Novela de sólo tres protagonistes, hai una ausencia, abúltame que fecha a posta, d’otros personaxes secundarios que dean solombra a les sos complexes y cambiantes rellaciones, colo que l’autor consigue un grau d’intensidá pergrande no que nos cuenta. La historia nun da respiru, anque’l tonu col que se narra seya más bien calmáu. Pero ún, polo menos yo, pue terminar obsesionáu cola trama inclusive una vez que dexa descansar la novela. El final pega, amás, un cambiu bruscu y cuando paez que ya ta too cuntao y que s’aldovina lo que va a pasar, Cercas dexa un par de cabos sueltos pa la interpretación del llector. D’esi mou, caún pue re-interpretar los últimos fechos, en función de lo que lleó hasta entós. Y según ellos, la solución queda en manes del propiu llector. O seya, como la vida mesma. El títulu que pongo a esti pequeñu comentariu, «La frontera azul», fai referencia a una vieya serie xaponesa de TV, mui famosa, a la que faen mención los protagonistes de la novela: el ríu Liang Shang Po. Pa un llau taben los malvaos, los traidores, los políticos y militares «oficiales». Pal otru los proscritos, pero que lluchaben escontra la tiranía y la maldá. Per un momentu’l «Gafitas» pensó qu’ellos taben pa esti llau del ríu. Cercas, nesta guapa novela que me prestó lleer, cuestiona esi posicionamientu un poco infantil. La frontera ye más «porosa» de lo que paez.
