TÍTULU: «Todas las historias y un epílogo»
AUTOR: Enric González
EDITORIAL: RBA
AÑU: 2011
CONOCER, COLA SONRISA NOS LLABIOS.- El catalán Enric González (Barcelona, 1959) fue, a lo llargo de munchos años, corresponsal del prestixosu diariu “El País”. Primero como corresponsal de guerra y llueu de paz. D’esta última experiencia (de la otra namás tenemos unes pintoresques pincelaes) Enric fue asoleyando unes curioses histories de los llugares nos que desendolcaba’l so llabor. Asina surdió primero “Historias de Londres” (1999), llueu “Historias de Nueva York” (2006) y pa la fin “Historias de Roma” (2010), tres deliciosos llibrinos qu’agora, con mui bon criteriu, la editorial decidió arrexuntar y publicar nun solu volume.
El gran méritu d’Enric González ye facer un llibru amenu y orixinal d’unes ciudaes tan conocíes, lliteraturizaes y cinematografíaes como son Londres, N. York o Roma. Paecería que poco o nada nuevo podría dicise d’elles, pero l’autor catalán ye capaz de da-yos la vuelta y poneles del revés, amosándonos una visión nueva, chiscada d’un gran sentíu del humor. El llibru –los llibros- lléense, pues, con una gran sonrisa nos llabios ante una prosa, al tiempu culta y popular, que nos fala siempre dende un puntu de vista personal. González cuenta lo que vio y lo que vivió, anque nun renuncia a ilustranos, baxo esi prisma humorísticu, d’aspeutos históricos, artísticos, culturales o lliterarios cuando vien a cuentu, que ye cuasi siempre. Pero amás, les pequeñes histories que se nos cuenten, nun falen sólo de la parte conocía de les tres grandes ciudaes, sinón tamién de los sos barrios más ancultos, d’eses cerveceríes, cafés o “tugurios” que nun vienen nes Guíes Turístiques al usu, pero qu’avecen a ser les que conformen les ciudaes. Pa que se vea, namás como exemplu, la forma de narrar que tien Enric, voi trescribir el primer párrafu del Epílogu qu’amiesta n’especial pa esta prestosa edición. Diz asina.
“Para clasificar a un idiota basta con dejarle envejecer. Llegada una cierta edad, hay quien comprueba que sus convicciones más firmes eran dudosas o erróneas, que ha dedicado un montón de tiempo a aprender casi nada y que, aunque la vida en general esté muy bien, funciona bastante mal. A estas alturas, me esfuerzo en ser uno de esos idiotas y en mantenerme alejado de los otros idiotas, los que ya lo saben todo y siempre tienen razón. Prefiero el desengaño al engaño. Prefiero ser inútil que peligroso. Prefiero no hacer el ridículo más de lo estrictamente necesario”. Una declaración de principios –amiesto yo- que define perbién a esti paisanu cultu, simpáticu y bon escritor. Un llibru que vos recomiendo dafechu.
