Títulu: Diez de diciembre
Autor: George Saunders
Torna: Ben Clark
Editorial: Ediciones Alfabia
Añu: 2013
UNOS GUAPOS Y ESTRAÑOS CUENTOS.- Tenemos la esperiencia de que, cuando tamos delantre de dalgo, xeneralmente una obra d’arte, que nun somos a definir mui bien o que, por dalgún motivu, nun sabemos espresar los nuestros sentimientos sobre ella solemos dicir: “Ye mui orixinal”, como un mou d’afirmar: “Nun sé, tíu, si me presta o non me presta. Si tien valir o ye una engañifa, pero en cualquier casu nun me dexa indiferente.” Dende llueu, la orixinalidá ye un componente que yo valoro muncho a la hora d’amirar dalguna cosa. Abasta yá de coses repitíes, d’histories o pintures o músiques “masuñaes”.
Dalgo d’esto ye lo que’l llector de George Saunders pue atopar cuando s’asitia delantre un de los sos cuentos: ye orixinal. Y la so orixinalidá vien dada en fondu y forma. Hasta tal puntu ye asina, que’l propiu traductor vese na necesidá de poner al empiezu una “Nota del traductor”, xustificando l’emplegu d’un llinguax distintu al que tamos avezaos a lleer. Y ye que Saunders utiliza, adrei, por boca de los sos personaxes “errores y deslices al hablar y al expresarse” (Ben Clark dixit). Pero eso ye lo de menos. La orixinalidá del autor norteamericanu reside, más bien, na propia estructura del cuentu, na so forma de narrar, de rellacionar les coses y les persones, de mecer suaños y realidaes. Saunders –los sos personaxes- tien un mundo propiu, a medies ente la realidá y la velea, ente la traxedia y el final feliz. Si tuviere que busca-y dalgún referente, cosa perdifícil si tamos falando d’orixinalidá, podría dicir que me recuerda a dellos cuentos de Phil K. Dick, afitaos na Ciencia-Ficción, pero ensin esi tastu tan irreal que munches veces los acompañen. Saunders ye muncho más real y les sos histories son crudes y esmolecedores.
Nesti llibru, l’autor recueye un total de diez cuentos de los que la metada d’ellos seríen imprescindibles en cualisquier antoloxía de cuentu modernu: “Escapar de La Cabeza de Araña” ye, posiblemente, el que más me gustó de toos. Una historia que t’atrapa, inclusive dende unes primeres llinies nes que nun sabes qué ta pasando, pero que pasu ente pasu vas aldovinando hasta llegar a un final d’una guapura que manca. Pero tamién me prestaron muncho: “Vuelta de honor”, “Los diarios de las Chicas Sémplica” y el que da títulu al llibru, “Diez de diciembre”. Y resulta simpatiquísimu, anque dalgo cruel, “Mi fiasco como hidalgo” que se llee cola sonrisa nos llabios.
Diznos la editorial que George Saunders, ganador d’abondos premios de cuentos nel so país, ye finalista esti añu del prestixosísimu National Book Award por esti llibru. Nun m’estraña. En cuantes a min, nun sé si recomendávoslu o non, porque tengo mieu a qu’a dalgún nun-y preste y los llibros tán mui caros. Pero, dende llueu, al que-y guste dalgo nuevo, distinto y orixinal que nun dexe de lleelu. Yo nun m’arrepiento.
