Títulu: “El otro nombre de Laura”
Autor: Benjamin Black
Editorial: Alfaguara
Añu: 2008
UNA TURBIA NOVELA.- A estes altures de la película yá tol mundu sabe que Benjamin Black ye l’alcuñu del escritor irlandés John Banville, y sábelo porque ye’l recién ganador del premiu Príncipe d’Asturies de les Lletres. Tengo que confesar la mio inorancia sobre dambos, autor y alcuñu, a nengún conocía. Esto ye lo bono de los premios, que tienes la oportunidá de recuperar el tiempu perdíu. Como’l citáu Banville tien fama d’escritor “escuru” y difícil, decidíme principiar pol so “alter ego” Black, apellíu que-y va perbién pa escribir novela “black”, o seya, negra.
“El otro nombre de Laura” ye una novela negrísima pesie a que los muertos son pocos y la violencia tampoco ye escesiva. Pero, en cambiu, trátase d’una historia turbia, cafiantemente obscena, na que gran parte –la mayoría- xira al rodiu del sexu y de la so dependencia en persones que paecen normales, pero qu’escaecen los sos escrúpulos dexándose banciar nuna espiral que va a llevalos a la destruición.
Ye, pues, una novela que se llee con inquietú, con desasosiegu, con esmolición. Una llectura que nun acaba de prestate, pero que quies siguir lleendo pa ver en qué apara. Los personaxes arrastrien la so tristura pela vida, tapeciendo los sentimientos, metanes un decoráu irlandés nel que siempre llueve y ye de nueche. La verdá ye qu’ hai cachos nos que se demora demasiao, que se te fai pesada y que l’aición paez que nun avanza, pero siempres vien a salvala una estraordinaria descripción o un diálogu brillante. Ya nun digo de les reaiciones de les muyeres, que a min siempre se m’escapen na vida real, pero que nesta novela ye por demás, con comportamientos inintelixibles. Eses que saben que’l paisano ye un sinvergoña y que va a armá-yla, pero que nun puen dexar de facer lo que faen. Un aparente suicidiu que nun ye tal. Una vieya amistá recuperada. Un forense viudu y desengañáu en cata de nun se sabe qué, quiciás un poco de calor humanu. Unos personaxes atrapaos nel tópicu carrusel de la vida qu’intenten sacar la tiesta… son dellos de los elementos d’esta trupa novela que, a la fin, nun sabes si te prestó o non, pero que nun fuiste a dexar de lleer. Dalgo querrá dicir eso ¿non?
