Títulu: El regate
Autor: Sérgio Rodrigues
Torna: Juan Pablo Villalobos
Editorial: Anagrama
Añu: 2014
UN PRECIOSU REGATE.- Pa los que nos presta’l fútbol, un bon regate, con sentíu, ye una de las xugaes más guapes que pues ver nun estadiu. Y digo con sentíu porque yo odio a esos xugadores que regateen pol meru placer de facelo, d’abusar del contrariu o de llucise delantre’l públicu. Esos qu’avezamos a llamar “los chupones”. Un bon regate tien que ser siempres necesariu, non inútil, y busca facer una pausa pa qu’un compañeru se desmarque y poder pasa-y el balón, o engañar al contrariu faciendo que vas facer el pase y, de sópitu, quedar solu delantre’l porteru pa marcar. El de Sérgio Rodrigues ye un regate xustu y necesariu.
Sérgio ye un autor brasileñu, nacíu en Muriaé nel 1962, y que fue durante diez años periodista deportivu. Home de gran cultura, pasó depués a tocar los temes culturales na Prensa mentanto alternaba cola escritura: cuentos, noveles y crítica lliteraria. Amás, caltién una columna diaria, “Sobre palavras”, que trata de temes históricos, culturales y gramaticales de la llingua portuguesa. Creo qu’ésta ye la primer novela que publica n’España y cuido que va a tener la gran crítica que merez.
El regate ye una novela polivalente na que, con un aparente fondu futboleru, tóquense unos cuantos años de la historia de Brasil, unos años d’esperances y frustraciones. Esperances porque fueron los de la llegada al poder de Joâo Goulart que traxo aire nuevu y democracia al país, y frustraciones porque l’esperimentu duró poco, atayáu pela dictadura encabezada por Humberto Castelo Branco: “…un mariscal viudo de porte simiesco, enano, sin pescuezo, con cara de bandolero…”, como lu define Rodrigues. Los años de la Bossa Nova, de los trunfos de la seleición brasileira, de Pelé, de Garrincha, de la movida nocturna y les reuniones en casa de los amigos, onde se fala de lo divino y lo humano.
Pero esto tamién ye un decoráu. Un telón que nos ilustra y nos entretién mentanto conocemos la verdadera historia del llibru, la fonda, la que lu traviesa de principiu a fin: la relación de Neto, con so padre. Murilo Filho ye tou un personaxe que protagoniza esa parte de la historia de Brasil. Dende les páxines deportives del periódicu onde escribe, Murilo, famosu, muyeriegu, seductor, nun mira pal so fiu nin pa la so muyer que muerre en circunstancies estrañes. Neto nun-y lo perdonará. Lloñe del padre, asiste como espeutador a les correríes del so proxenitor hasta que, ventiseis años después, ésti lu llama al so llau cuando yá ta a piques de morrer. La relación de dambos personaxes, entreveraos poles sos propies histories personales ye interesantísima, y recuérdame un poco a la de “Gracias por el fuego” de Benedetti, anque la de Rodrigues ye más amplia y más rica. Pero, al tiempu, Murilo escribe la biografía d’un futbolista imaxináu, Peralvo, muncho meyor que Pelé, que tien el dau de ver lo que va a asoceder un segundu enantes de qu’ocurra. Peralvo participa de la maxa de los bruxos brasileños que lu van facer trunfar… a un altu preciu. Una historia, dientro la historia, guapísima.
En resume, una novela d’eses que se tilden d’imprescindible, escrita con una riquísima prosa mui cerque de la cultura pop, que t’entra pelos sentíos pero que t’aporta a lo más fondo de los sentimientos. Pa nun perdela.
