Títulu: «Proyecto de Constitución Federal del Estado Asturiano»
Estudiu preliminar: Sergio Sánchez Collantes
Edita: Junta General del Principado de Asturias y Aytº de Gijón
Añu: 2009 (del orixinal de 1890)
Por pura casualidá, como asoceden normalmente les coses nesti país ensin igua, atopóse n’Arxentina l’orixinal d’esti «Proyecto de Constitución Federal del Estado Asturiano», aprobáu pola Asamblea Rexonal de los Federalistes Asturianos en 1883, y ratificáu en 1888 pola Asamblea Nacional.
Nel, y a traviés de los dieciocho Títulos que lu componen, los federalistes asturianos, al empar colos d’otres comunidaes del estáu español, van esgranando la so idega de cómo organizar, de cómo encadarmar esi Estáu Federal pol que naguaben, partiendo d’abaxo a arriba, ye dicir, de los «municipios o conceyos», pasando polos pautos interrexonales (hebo intentos de Federaciones como la Galaico-Astur-Lusitano-Leonesa), hasta algamar la picalina de la pirámide, onde toos tuvieren bien representaos. Esti articuláu, trata de temes como la declaración de derechos individuales, la declaración de derechos políticos y sociales, de la Xunta Suprema Asturiana, del Poder Executivo, del Xudicial, de la Enseñanza gratuita y obligatoria, de los impuestos, de la beneficiencia, etc.
L’ estudiu introductoriu de Sergio Sánchez Collantes ye un verdaderu ensayu sobre’l federalismu asturianu y los sos antecedentes. Sólo por él yá paga la pena facese col llibru. Nel, vemos la pergrande importancia que tuvo la figura del mélicu xixonés Eladio Carreño, Alcalde de Xixón na Primera República, gran motor y alma mater d’un federalismu asturianu que tuvo muncha más importancia de la que pensábemos. Asina, yá nel 1869 ta documentáu’l sólidu entramáu organizativu que s’espurría por bona parte del país astur, destacando penriba d’otros Xixón, onde llegó a haber subcomités mesmamente en barrios periféricos y parroquies rurales (el Natahoyo, Cenero, Tremañes, Granda, Bernueces y Serín) y tamién n’Uviéu.
Capítulu aparte constitúi la importancia que se-y daba al tema de la llingua, anque equí’l Proyeutu nun se publicó billingüe como en Cataluña. Asina, na proclama d’El Boletín Federal (órganu del Partíu Federal Asturianu) convocando a la eleición de representantes, apelando a la personalidá histórico-cultural d’Asturies: «…en vano esa centralización trata de borrar su peculiar modo de ser; aún conserva su lengua y sus trajes, sus usos y costumbres y su espíritu federal se despierta en todos los actos solemnes de su honrosa historia (…) Asturias sintió su personalidad e integró su soberanía, siendo la primera en declarar la guerra al coloso Napoleón I, enemigo de España…)
Llibru, pues, perinteresante, de llectura meditada, y acompañáu d’un estudiu y unes notes a pie de páxina que merez la pena conocer y valorar. Y tener como llibru de consulta pa cuando se quiera minusvalorar, una vuelta más, la importancia histórica del nuestru pueblu.
